Автор:
Билигин хамсык бириэмэтигэр, олохтоох библиотека ыытар тэрээһиннэрэ, куйаар ситимин нөҥүө социальнай ситимнэргэ ыытыллар буоллулар. Ол курдук нэһилиэнньэҕэ ыытыллыбыт тэрээһиннэри кылгастык билиһиннэрэр буоллахха, алтынньы ый Комсомол күнүгэр анаан С.П.Оконешников аатынан “Айылгы” КК кытта түөлбэ олохтоохторугар анаан ыытылынна. Нэһилиэкпит түөлбэлэрэ биэстии киһилээх хамаанда туруоран түөрт түһүмэҕинэн күрэхтэстилэр. Ол курдук “Албан ааттаах Комсомол” викторина, урукку комсомольскай хаартыскаларынан видеоролик, атрибуттаах, лозуннаах хаартыскаҕа түһүү уонна музыкальнай нүөмэрдэрин видеоҕа устан ыыттылар. Уопсай түмүккэ кыайыылааҕынан “Чараҥ” түөлбэ ( сал.Суздалова О.В) таҕыста. Кыайыылаахтар Дипломунан, анал бирииһинэн бэлиэтэннилэр.
Каникулярнай тэрээһиннэр чэрчилэринэн 6-7-8 кылаас үөрэнээччилэригэр ”Бары биир сомоҕо” Сомоҕолоһуу күнүгэр аналлаах интеллектуальнай оонньуу ыытылынна. Барыта түөрт түһүмэхтээх (викторина, өс хоһооннорун салҕааһын, Сомоҕолоһуу тематыгар видеоролик,сомоҕолоһуу диэн тылтан тыл таһаарыы). Оонньуу түмүгүнэн кыайыылааҕынан 7 кылаас (сал.Евстафьева Анна Семеновна) буоллулар. Кыайыылаахтарга диплом, бары кыттыбыттарга сертификаттар уонна минньигэс бириистэр туттарылыннылар.
Сэтинньи ый — Байанай ыйа. Бу ый чэрчитинэн олохтоох библиотека Байанайга аналлаах кроссворд күрэҕин тэрийэн ыытта. Нэһилиэкпит ватсап группаларыгар ыытыллыбыт күрэххэ Чурапчыттан, Амматтан, Нам Аппаанытыттан тиийэ кыттаннар күрэхпит географията кэҥээбитэ биһигини үөрдэр. Биир бастакынан бары ыйытыыга сөптөөх эппиэти ыытан кыайыылааҕынан таҕыстылар Бөтүҥ орто оскуолатын сэттис кылааһын үөрэнээччитэ Ярослав Сивцев уонна Аппааны нэһилиэгиттэн Наталья Ущницкая. Кыайыылаахтарга анал бириистэр туттарылыннылар.
Маны тэҥэ «Эҥсиэли” радио үлэһиттэрин кытта улууспут олохтоохторугар 2021 сылга бэлиэтэнэр Саха сиригэр комсомол тэриллибитэ 100 сылыгар анаан “Комсомольскай эдэр сааспыт умнуллубат строкалара” аудиохоһоон ааҕыытыгар радиомарафон ыытылла турар. Төһө да пандемия бириэмэтэ буолан самоизоляция режимин тутуһан дьиэҕэ олордоллор дьоммут – сэргэбит ыытыллар тэрээһиннэргэ көхтөөхтүк кытталлар.
Валентина Колесова
Бөтүҥ модельнай библиотекатын сэбиэдиссэйэ
