28.03.2024

Дорҕоон түһүлгэтэ — 2023

Бүгүн, муус устар 21 күнүгэр, Киин библиотека конференц саалатыгар улуустааҕы сылын аайы ыытыллар эр дьон ортотугар  “Дорҕоон түһүлгэтэ” диэн сахалыы дорҕоонноохтук уус – уран ааҕыы күрэҕэ буолан ааста.

Быйылгы күрэх Арассыыйаҕа педагог уонна настаабынньык, Саха Өрөспүүбүлүкэтигэр Үлэ, Нам улууһугар биир санааланыы уонна сомоҕолоһуу сылларын чэрчитинэн ыытылынна. Күрэҕи иилээн – саҕалаан ыытта библиотекарь Татьяна Михайлова. Дьүүллүүр сүбэҕэ олордулар: Вера Цыпандина, УДНТ фольклорга специалиһа, Анна Слепцова – специалист по жанрам творчества диэн, УДНТ, уонна Александра Парникова, киин библиотека специалиһа.

Кыттыыны ыллылар Винокуров Арсен Викторович Нам улуустааҕы гимназиятын НВП учуутала, Осипов Айтал Андреевич Көбөкөн нэһилиэгэ, кулууп звукооператора, Новиков Михаил Андреевич – Модут нэһилиэгэ, оскуола дириэктэрэ, Протопопов Захар Николаевич, Никольскай нэһилиэгэ, Егоров Кирилл Владиславович, Хатын – Арыы нэһилиэгэ, музыка учуутала.

Күрэх саҕаланыытыгар улуустааҕы “Уолан ааҕыларын” күрэҕин кыайыылаахтара И. Гаврильев аат. Нам 1 нүөмэрдээх орто оскуолатын 10 кылааһын үөрэнээччилэрэ, «Күндүл» хоһоон ааҕар бөлөҕө П. Ойуунускай “Көҥүл ырыата” диэн хоһоонунан кыттааччылары эҕэрдэлээтилэр.

Күрэх балаһыанньанан 5 түһүмэхтэн турда: 1 түһүмэх – прозаны ааҕыы, 2 түһүмэх – хоһоон, 3 түһүмэх – научнай ыстатыйа, 4 түһүмэх – дьүүллүүр сүбэ сорудаҕа, талан ылбыт темаларыгар 5 мүн. иһигэр кыттааччылар хоһоон айдылар, уонна бүтэһик 5 түһүмэх – финал. Хас түһүмэх ахсын дьүүллүүр сүбэ тута түмүк балларын таһааран истилэр, ол түмүгүнэн финалга 2 үрдүк баллаах кыттааччы хаалан “Учуутал” туһунан саха суруйааччыларын айамньыларыттан — кэпсээннэртэн талан ылаат тута ааҕыыларын түмүгүнэн кыайыылаах тахсан кэллэ.

 Кыайыылааҕынан таҕыста Арсен Винокуров, иккис миэстэни ылла Новиков Михаил Егорович, үһүс миэстэ Протопопов Захар Николаевич. Кыайыылахтар Добун суругунан, сыаналаах бириистэринэн, кыттааччылар туоһу суругунан, бэлэхтэринэн наҕараадаланнылар.

Бары кыттааччылар күрэҕи сэҥээрдилэр, өссө да ыытылла турарыгар баҕа санааларын эттилэр.

Татьяна Михайлова

Мы используем cookie-файлы для наилучшего представления нашего сайта. Продолжая использовать этот сайт, вы соглашаетесь с использованием cookie-файлов.
Принять