29.03.2024

Намҥа «Полярная звезда» сурунаал ыалдьыттаата

Нам улууһун Ленскэй нэһилиэгэр Н.М. Рыкунов аатынан киин модельнай  библиотекаҕа бэс ыйын 8 күнүгэр истиҥ-иһирэх көрсүһүү буолан ааста. Ол курдук биһиэхэ күндү ыалдьыттарынан буоллулар Ираида Попова – Россия Суруйааччыларын, суруналыыстарын сойуустарын чилиэнэ, «Полярная звезда» сурунаал эппиэттиир сэкэритээрэ уонна Мария Гольдерова – Россия суруналыыстарын, СӨ Суруйааччыларын сойуустарын чилиэнэ, «Полярная звезда» сурунаал публицистика салаатын эрэдээктэрэ. Тэрээһиммит сыалынан-соругунан Саха сирин историятыгар, культуратыгар уонна литературатыгар сүҥкэн кылааты киллэрбит “Полярная звезда” уус-уран литературнай уонна общественнай-политическай сурунаал ааҕааччыларын кытта көрсүһүүтэ буолар. Бастатан туран Ираида Гаврильевна сурунаал туһунан сиһилии билиһиннэрдэ, историятыттан саҕалаан билигин хайдах тыыннаан үлэлии-хамсыы олорорун уонна ааҕааччылары суруйтарарга ыҥырда. Ыалдьыттарбыт айар үлэлэрин туһунан кэпсээн-ипсээн сэҥээриини ыллылар. Мария Валерьевна мустубут дьоҥҥо социальнай ситим нөҥүө бэйэ үлэтин, айымньытын хайдах уратытык тулалыыр эйгэҕэ тиэрдиэххэ сөптөөҕүн кэпсээтэ, намыын матыып тыаһыгар уйдаран, тыл сүүмэрдээн биэрэн хоһоон айдаран ылан айар куттаах дьоммутун үөрүү-көтүү кынаттанан үөһээ көтүттэ. Ираида Гаврильевна Нам сириттэн төрүттээх буолан, истиҥник, чугастык ылынан сэргээн, сэҥээрэн көрүү-истии буолла. Кини «Кырса уонна Баһырҕас» оҕолорго аналлаах сэһэнин биһирэмнээтэ, бэлэх уунаталаата. Кэлбит ыалдьыттарбытыгар харда-эҕэрдэ тылларын махтанан туран эттилэр: Иван Степанович Новиков – народнай театр режиссера, Алексей Михайлович Татаринов-Удьурҕай «Отуу уота» литературнай түмсүү бэрэссэдээтэлэ, Майя Романовна Софронова Намнааҕы кииннэммит библиотечнай ситим директора уонна «Отуу уота» литературнай түмсүү чилиэннэрэ Григорий Константинович Эверстов-Тыыппалаах, Марта-Мария – Мария Петровна Мохначевская, Иван Афанасьевич Бубякин-Чөҥөчөк, Прасковья Дмитриевна Байанаева. Онон бүгүҥҥү көрсүһүүбүт икки өртүттэн туһалаах буолан астынан-дуоһуйан, хаартыскаҕа түһэн сэргэхтик туттан-хаптан, үөрүү биир чаҕылхай күнүн тутан тарҕастыбыт.

Мы используем cookie-файлы для наилучшего представления нашего сайта. Продолжая использовать этот сайт, вы соглашаетесь с использованием cookie-файлов.
Принять