Автор: 
Бу дьыл балаҕан ыйын 30 күнүгэр , Бөтүҥ нэһилиэгин Семен Петрович Оконешников аатынан “Айылгы” культура киинигэр уһулуччу талааннаах, хатыламмат лирическэй куоластаах, «Саха сирин кыһыл көмүс тенора” диэн норуот таптаан ааттыыр ырыаһыта, Россия народнай артыыһа, “Гражданскай килбиэн” бэлиэ хаһаайына, Нам улууһун, Бөтүҥ нэһилиэгин бочуоттаах гражданина Семен Петрович Оконешниковка анаммыт «Саха сирин көмүс куолаһа» кинигэни сүрэхтиир бэлиэ тэрээһин буолан ааста.
Тэрээһин саҕаланыыта “Саха сирин көмүс куолаһа” кинигэ ырытыытын онордо олохтоох модельнай библиотека сэбиэдиссэйэ Валентина Колесова.
Бу кинигэ таҥыллан тахсыытыгар быһаччы үлэлэспит дьонунан буолаллар: Семен Петрович бииргэ төрөөбүт балта, библиотечнай үлэ ветерана, СР культуратын туйгуна Матрена Петровна Оконешникова, олохтоох библиотека сэбиэдиссэйэ, Саха Республикатын культуратын туйгуна Валентина Спиридоновна Колесова уонна С.П.Оконешников аатынан «Айылгы” культурнай киин уус-уран салайааччыта Мариянна Михайловна Данилова.
Саҥа кинигэ Дьокуускай куоракка , “Бэчээт дьиэтэ” типографияҕа бэчээттэнэн тахсыбыт. “Айылҕаттан айдарыылаах, талааннаах, эппиэтинэстээх, таптыыр дьыалатыгар бэриниилээх киһи сырдык уобараһа биһиги сүрэхпитигэр мэлдьи тыыннаах”- диэн тылларынан үөрүүлээх тэрээһини арыйда «Бөтүҥ нэһилиэгэ» МТ баһылыга Михаил Васильевич Макаров уонна кинигэ тахсыытыгар үлэлэспит, күүс-көмө буолбут дьонноругар “ Нам улууһа” МТ баһылыгар Юрий Иннокентьевич Слепцовка,
Матрена Петровна Оконешниковаҕа, Лира Львовна Габышеваҕа,
Валентина Спиридоновна Колесоваҕа, Мариянна Михайловна Даниловаҕа уо.д.а дьаһалта аатыттан Махтал суруктары туттарда.
Бу күн Семен Петрович туһунан истин иһирэх тыллардаах ахтыылары чугас аймахтара, бииргэ оҕо , эдэр сааһа ааспыт үөлээннээхтэрэ, коллегалара Д.К.Сивцев – Суорун Омоллоон аатынан опера уонна балет театрын артыыстара оҥордулар. Семен Оконешников киһи быһыытынан сэмэйин, элэккэйин , хатыламмат талаанын, кини холобур буолар олоҕор сүгүрүйэллэрин олус астына кэпсээтилэр.
Тэрээһини Семен Петрович доҕотторо РФ уонна СР народнай артыыһа Альбина Борисова,РФ уонна СР народнай артыыһа Иван Степанов,СР народнай артыыстара Мария Николаева,Александр Емельянов,Григорий Петров,Феодосия Шахурдина ылбаҕай ырыаларынан киэргэттилэр, Амматтан Семен Петрович эдьиийин оҕолоро кырыымпа тыаһынан “Кыыс Амма” ырыанан доҕуһуоллаан бар дьон сүргэтин көтөхтүлэр.
Бу күн “Айылгы” сынньалан киинигэр Семен Оконешников олоҕун, айар үлэтин кэпсиир стендэ үөрүүлээх быһыыга арылынна.
Үтүө мааны киһибит Семен Оконешников туһунан кинигэ- үйэлээх өйдөбүнньүк, үүнэр көлүөнэ, эдэр ыччат төрөөбүт дойдуларын историятын, дьонун-сэргэтин үөрэтиигэ туһалаах буоларыгар эрэнэбит.
Валентина Колесова,
Бөтүҥ олохтоох модельнай библиотекатын сэбиэдиссэйэ
