29.03.2024

«Эҥсиэлилиин бииргэ»

Сэргэх сэһэннээх, сойбот сонуннаах улууспут хаһыата -“Эҥсиэли” — бу күннэргэ 85 сыллаах үбүлүөйүн бэлиэтиир.

  Бу кэрэ-бэлиэ түгэни көрсө Намнааҕы кииннэммит библиотечнай ситим алтынньы ый 5 күнүттэн 10 күнүгэр дылы «Эҥсиэлилиин бииргэ» диэн ааҕааччыларга анаан Нэдиэлэ былааннаан ыытар. “Эҥсиэли”  хаһыат историятын төһө билэҕин?” тургутук ыйытыктар, “Саһарбыт страницалар тугу кэпсииллэр” информация күннэрэ, нэһилиэк общественнай корреспонденнарын сырдатыы, хаартыска күрэхтэрэ, акциялар куйаар ситимин нөҥүө ыытыллыахтара. Хатырык модельнай библиотеката алтынньы 8 күнүгэр киэһэ 20 чаастан “Эҥсиэли”  хаһыат кылаабынай редактора В.Г. Касьяновы кытта библиотека Инстаграм сирэйигэр аһаҕас эфиры тэрийэн ыытыаҕа. Бу тэрээһиннэргэ улууспут дьоно-сэргэтэ, ааҕааччылар көхтөөх кыттыыны ылыахтара диэн эрэнэбит.

   Улуус библиотекалара “Эҥсиэли” хаһыаты кытта биир ситимнээхтик, айымньылаахтык үлэлииллэр. Нэһилиэк аайы библиотекалар хаһыаты суруйтарар буолан, ааҕааччылар ааҕар саалаҕа кэлэн саҥа нүөмэрдэри эбэтэр урут тахсыбыт наадыйар ыстатыйаларын булан ааҕыахтарын сөп. Библиотека үлэһиттэрэ хас биирдии нүөмэри кичэллээхтик тиһэн, ууран иһэллэр. Киин библиотекаҕа 50-60 сыллартан саҕалаан “Колхоз сирдьитэ”, “Ленин суола”, “Эҥсиэли” диэн ааттарынан тахсыбыт улууспут хаһыата хараллан сытар.    Хаһыат страницаларыгар библиотекаларга ыытыллыбыт тэрээһиннэр тустарынан өрүү сырдатыллар, ааҕааччыларга анаан викториналары, күрэхтэри хаһыат нөҥүө ыытааччыбыт. Библиотекардар Валентина Колесова (Бөтүҥ), Февронья Бочкарева (Көбөкөн) общественнай корреспондент быһыытынан, өрүү нэһилиэктэрин сонуннарын сырдаталлар. Аныгы үйэ тэтиминэн билигин «Эҥсиэли” 2000 сыллардаах нүөмэрдэрин библиотека сайтыгар электроннай варианын эмиэ булан ааҕыахха сөп.

   Намнааҕы киин библиотекаҕа 1988-1995 сылларга “Эҥсиэли” хаһыат кылаабынай редакторынан үлэлээбит журналист, поэт, “Отуу уота” литературнай түмсүү төрүттээччитэ, салайааччыта Николай Михайлович Рыкунов  аата 1996 сыллаахха иҥэриллибитэ. Библиотека коллектива бу үрдүк аатынан киэн туттабыт.

   Түгэнинэн туһанан, үтүө доҕотторбутун, “Эҥсиэли” хаһыат коллективын, ветераннарын 85 сыллаах үбүлүөйүнэн истиҥник эҕэрдэлиибит! Тапталлаах хаһыаппыт өссө да уһун сылларга үүнэ-сайда, тупса, чэчирии турарыгар, элбэх үтүө сонуннаах хас биирдии ыалга күүтүүлээх күндү ыалдьыт буоларыгар баҕарабыт!

Раиса Гоголева

Н.М.Рыкунов аатынан киин библиотека методическай отделын сэбиэдиссэйэ

Мы используем cookie-файлы для наилучшего представления нашего сайта. Продолжая использовать этот сайт, вы соглашаетесь с использованием cookie-файлов.
Принять