РУБРИКАТОР
СИДОРОВ ГАВРИЛ ЕГОРОВИЧ
(1924-1942)
1942 сыл атырдьах ыйыгар Гаврил сэриигэ ыҥырыллар, кини оччолорго баара-суоҕа 18 сааһын саҥа туолбут эдэркээн оҕо этэ... Биир саастыылаахтара ахталларынан, Гаврил Сидоров наһаа сырдык, кыраһыабай, талааннаах, бары өттүнэн дьоҕурдаах уол эбитэ үһү. Ахтыбыыс хомсомуол, элэккэй, сытыы-хотуу Ганя, бииргэ сэриигэ ыҥырыллыбыт дойдулаахтарын кытта бэбиэскэ тутан баран, тыыннаах эргиллибэтин билбит курдук, кыараҕас кулууп дьиэтигэр, нэһилиэк ыччата «атаарыы киэһэтин» тэрийбитигэр, үс түүнү тохтообокко хормуоскаҕа оонньуу-оонньуу, сүрдээх кутурҕан ырыалары ыллаабыт. Ыччаттар үҥкүүлээбэккэ эрэ ырыалары истэннэр ытаһа тураахтаабыттар. Кыра балта Маня, убайын кутурҕан ырыатын тулуйан истибэккэ, дьиэтигэр баран уйа-хайа суох ытаабыт. Муҥ саатар убайа Уйбаан туһунан сурах-садьык суох эбит.
Дьокуускайга Даркылаахха киирэннэр, паромунан айаннаан Иркутскайга тиийбиттэр. Бэлэмнэнии курсугар, биир ый сылдьан баран, сэриигэ барбыттар. Хотугулуу-Арҕаа фронт састаабыгар киирсэн, Псков куорат анныгар кыргыһыыга биир ый буолан баран, төгүрүйүүгэ түбэһэн өлбүтэ. «Гаврил Егорович Сидоров погиб в боях под Псковом, место захоронения неизвестно».
Ахтыыны суруйда балта Л.Е. Бочкарева-Жиркова