РУБРИКАТОР
ДЬОННО АНАММЫТ ОЛОХ
Мин хос эһэм Слепцов Иннокентий Иннокентьевич икки улуу өрүс — Лена уонна Алдан икки ардыгар турар кэрэ айылҕалаах Арбын нэһилиэгэр 1924 сыллаахха балаҕан ыйын 15 күнүгэр төрөөбүтэ. Сэрии иннигэр Хатырык оскуолатын сэттэ кылааһын бүтэрбитэ. Саҥа олоххо үөрэ-көтө үлэлии сырыттахтарына биһиги Ийэ дойдубутугар Гитлеровскай Германия сэриинэн саба түспүт.
Эһэм 1943 с. бэс ыйын 17 күнүгэр бэбиэскэ тутан Чита уобалаһыгар 210-с дивизия 582 стрелковай полкатыгар тиийбитэ. Кини бэргэнник ытар дьоҕурдааҕын таба көрөн, 644 стрелковай полкаҕа снайпердар роталарыгар снайперынан ылбыттара. Бу сэриигэ эһэм бииргэ төрөөбүтэ Слепцов Гаврил Иннокентьевич атаҕын буулдьа тоҕо тэбэн аҥар атаҕа суох бааһыран кэлбит. Эһэм 1945 с. бэс ыйын 25 күнүгэр диэри снайперынан сылдьыбыта. Ол кэнниттэн Монголияҕа, Кытайга 1945 с.
Японскай милитаристары утары сэриигэ пулеметчигынан кыттыыны ылбыта. Уһун түөрт сылы быһа сэриигэ сылдьыбыт саха хорсун саллаата 1947 с. муус устар ыйга төрөөбүт дойдутугар эргиллэн кэлбитэ.
Эһэм төрөөбүт колхоһугар кэлэн үлэлиир. Хас күн ахсын от охсуутугар 2-лии гектар сири охсон бар дьону сөхтөрбүтэ, билигин да уос номоҕуттан түспэт. Кини от охсорго бэйэтэ оту кэбиһэр Исаков диэн агрегаты оҥорбута республика тыатын хаһаайыстыбатыгар туһалаабыта. Нэһилиэккэ уот дизелин станциятын аан бастаан кини үлэлэппитэ. Ойбонтон ууну носуоһунан оботторон, хотон иһигэр емкоска куттарыыны оройуоҥҥа бастакынан олохтообута. Токарь-сварщик буолан ититэр системаҕа, техникаҕа маастар этэ. Уу мотуорун оҥочотуттан саҕалаан баржаны соһор катерга моториһынан олоҕун тиһэх күнүгэр диэри үлэлээбитэ. Маны таһынан, кини нэһилиэк музыканынан биллэрэ. Мин эһэм дэгиттэр талааннаах, мындыр сүрэхтээх киһи этэ.
1973 с. Үлэ Кыһыл Знамята уордьанынан наҕараадаламмыта. Оттон сэриигэ кыттыбытын 8 мэтээл кэрэһэлиир. Биһиги дьоллоохтук олорорбут туһугар эһэм элбэх сыратын биэрбит. Билигин Арбын нэһилиэгэр киин уулусса мин эһэм аатын сүгэр. Ити уулуссаҕа кини олоҕун тухары үлэлээбит катера пааматынньык буолан турар. Мин эһэм Иннокентий Иннокентьевич эйэлээх олоҕу уһансыбыта. Мин эһэбинэн киэн туттабын.
Алеша СЫРОМЯТНИКОВ, улуустааҕы гимназия 5 кылааһын үөрэнээччитэ