РУБРИКАТОР
СЛЕПЦОВ ИННОКЕНТИЙ ВАСИЛЬЕВИЧ
Мин Нам улууһун Хатыҥ-Арыы нэһилиэгин олохтооҕо, Слепцов Иннокентий Иннокентьевич ахтыыбын Көбөкөн нэһилиэгэр Кыайыы 65 сылыгар аныыбын.
Мин бэйэм 1939 с. сэтинньи 29 күнүгэр төрөөбүтүм, педагогическай үлэ бэтэрээнээбин, СР Республикатын үөрэҕириитин туйгунабын, методист учууталбын, педагог-мастер умелец, үлэ ветеранабын, Хатыҥ-Арыы нэһилиэгин уонна Нам улууһун Ытык киһитэбин.
Аҕам Слепцов Иннокентий Васильевич 1915 с.т., Нам улууһугар Арбын нэһилиэгэр, тыа Арбыныгар Кэриэстээххэ төрөөбүтэ.
Аҕата Слепцов Василий Николаевич (Сэлинньэх) этэ, кини түөрт уоллааҕа.
1. Бастакы уола Слепцов Николай Василевич (Балхаан) син бэйэтин кыанар киһи этэ дииллэрэ. Кылаҕырга Совет председателэ буола сылдьыбыт. Бандьыыттары кытта утары, кыһыллары кытары бииргэ сэриигэ кыттыбыт киһи. Кэнники араас үлэлэргэ үлэлии сылдьан оһолго түбэһэн өлбүт сурахтааҕа. Киниттэн биир кыыстаах Слепцова Анна Николаевна диэн. Билигин икки оҕолоох, биир кыыһа куоракка улахан тэрилтэ менеджера, уола Намҥа педучилищеҕа электригынан үлэлиир. Билигин кыыһыгар куоракка олорор, норуот маастара.
2. Иккис уола Слепцов Николай Васильевич (Муочуку) киниттэн биир уоллааҕа, ол уол Самуил Фрунзеҕа, онтон Көбөкөҥҥө дьиэ атыылаһан, онно олоро сылдьан сүрэҕинэн ыалдьан өлбүтэ. Киниттэн биир уоллааҕа Валерка уонна кыыһа Вера, кэргэнэ Майя диэн этилэр.
3. Үһүс уол Слепцов Егор Васильевич (Обоччо) киниттэн хас да оҕолордоох. Света улахан кыыһа Черскэйгэ баар, онно хас да оҕолоох олорор. Тоня Слепцова (Румянцева) Намҥа олорор Света, Петя, Ларик, Кешуля, Аня хоту Черскайга, эмиэ хас да оҕолоох. Кеша диэн уол аҕыйах сыллааҕыта 2005 с. өлбүтэ. Андрей хоту Орто Халымаҕа баар.
4. Төрдүс уол мин аҕам Слепцов Иннокентий Васильевич сэттэ кылаастаах үөрэхтээх. Кыһыл дэриэбинэҕэ кулуупка сэбиэдиссэйдии сылдьыбыт.
Кэнники Кэбээйи оройуонугар, гражданскай сэрии геройа, аҥаар харах Егоров Гаврил Васильевичтыын учууталлыы сылдьан, аҕам оскуолаҕа остуорастыы сылдьар кыыһы кэргэн ылар, онтон сотору соҕус Намыгар төннөн кэлэр. Ити кэнниттэн Намҥа Госбаҥҥа главнай бухгалтерынан үлэлии сылдьан, 1942 с. Намын сириттэн Ийэ дойдутун көмүскүү барбыта.
1943 с. Сталинградскай кыргыһыыга сэрии толоонугар хорсуннук сэриилэһэ сылдьан, оччотооҕуга тааҥка командира, сэриигэ кимэн киирии кэмигэр, кини тааҥкаларыгар, снаряд түбэһэн умайан өлбүтэ диэн Горнай улууһуттан бииргэ сулууспалаабыт табаарыһа, сэрииттэн кыайыы көтөллөнөн кэлэн иһэн ийэбэр кэпсээн барбыта.
«Биһиги Кешалыын иккиэн андаҕар тыл бэрсибиппит, ким тыыннаах хааллаҕына дьиэлэрбитигэр сылдьан дьоннорбутугар кэпсиэхпит диэн мэктиэ тыл биэрбиппит. Сэриигэ тааҥканан кимэн киирэн иһэн, Кеша таанкатыгар снаряд түбэһэн умайан хаалбыта, ону биһиги кини умайбытын көрө-көрө иннибит хоту наступлениеҕа барар буоллахпыт. Онтон кэнники кини хайдах буолбутун билбэппит» - диэн харааста кэпсээбитэ. Оччотооҕуга 5 саастаах уол, ийэм тобугар өйөнөн туран истибиппин өйдүүбүн. Кэнники маамам кыра эрдэхпинэ орденнарын, медалларын оонньотор этэ, бу аҕаҥ киэнэ, маны иилинэ сырыт диэн оонньоторо, ол курдук сүттэҕэ.
Кэлин ийэбэр хара сурук кэлбитэ, ол күнтэн ийэм ыарахан охсууну ылбыта.
Сэрии ыар кэмнэ төһөлөөх ыалы, оҕону тулаайах хаалларбыта буолуой?
Сэрии тулаайаҕа уол Слепцов М.И. суруйда.
2010 с. кулун тутар 21 к.