РУБРИКАТОР
КУРУТУЙА АХТАБЫН
Биһиги нэһилиэкпититтэн Аҕа дойду Улуу сэриитин кыттыылааҕа, Аҕа дойду Улуу сэриитин I, II уордьаннар, 5 бойобуой мэтээл кавалердара Дьяконов Савва Николаевич I Украинскай фроҥҥа 3 сыл кэриҥэ сэбиэскэй буойуннар кэккэлэригэр сылдьан өстөөхтөрү кыдыйсыбыта. Смоленскай уобалаһы босхолоһо сылдьан бааһырбыта. Госпитальга эмтэнэн бойобуой армия кэккэтигэр иккиһин киирбитэ. Савва Николаевич ити кэнниттэн өссө биирдэ улаханнык бааһыран, төрөөбүт нэһилиэгэр төннөн кэлбитэ. Эчэйиитэ улахана бэрт этэ, уҥа илиитин үөһэ уҥуоҕун тоҕо ыттаран, илиитэ иҥиирдээх тириититтэн эрэ иҥнэ сылдьара. Сэрииттэн кэлэн баран хонтуораҕа, кулуупка оһох оттооччунан үлэлээбитэ уонна мантан ордук ыарахан үлэни кыайаахтаабат да буоллаҕа. Сүрэҕин баҕатынан колхоз үлэтигэр барытыгар түсүһэн, көмөлөһөн иһээхтиирэ. Савва Николаевич сэриигэ ыҥырыллан барарыгар бастакы кэргэниттэн төрөөбүт уола Степан Саввич 6-7 саастаах уол этэ, маачаха ийэтигэр Кэтириискэ хаалбыта. Ол саҕана Кэтириис Саввалыын 2 оҕолоох этилэрэ, кини Степаны бэйэтин оҕолоруттан атарахсытар этэ. Аанньа аһаабакка-сиэбэккэ бу уол дьоллоох куруук аччык сылдьаахтыыра. Аччык оҕо барахсан тыыннаах хаалар туһугар элбэх эрэйи-муҥу көрсөн улааппыта. Колхоз бородуукта угар ампаарыгар киирэн килиэп ылан сиэбитигэр буруйдаан, колхоз кыладыапсыга уолу тутан ылан, накаастаан илиилэрин быһаҕынан охсуолаан, тарбахтарын уҥуоҕун тоһутан турардаах. Ама да сэрии, сут буолбутун иһин, тоҥ сүрэхтээх дьон эмиэ бааллара. Кыра оҕо эрдэҕиттэн аас-туор, сут-кураан олоххо олорбут оҕо эрэйдээх, олоҕун устатын тухары төһөлөөх эрэйи-муҥу көрөн улаатаахтаабыта буолуой, олоҕор төһө охсууну ылбыта буолуой? Бу уол син дьон курдук ыал буолан, кэргэн ылан, оҕо төрөтөн олох олороохтуо эбитэ буолуо да... Улааппытын да кэннэ дьон атаҕастаан, Степан ону тулуйбакка кылгас олоҕу олорон ааспыта.