РУБРИКАТОР
СЭРИИ ВЕТЕРАНА - КЫҺАМНЬЫЛААХ ҮЛЭҺИТ
Тит Афанасьевич Гуляев бойобуой суола Смоленскайтан саҕаламмыта. Түүн этэ. Өстөөх авиацията куораты иирбиттии бомбалаабыта. Ыраах Саха сириттэн кэлбит саллаакка суостаах хартыына этэ. Кини манна фашистар киһи-аймах кыр өстөөҕө буолалларын илэ хараҕынан көрбүтэ. Өйө-санаата кинилэри абааһы көрөргө, харса суох кыргарга түмүллүбүтэ.
Онно уонтан тахса сууккаҕа охсуһан, диэн кэпсиир кини билигин, Орша таһыгар тимир суол ааһар сирин ылбыппыт, оборонаҕа турбуппут. Өстөөх биһиги оборонабытын тоҕу көтөөрү элбэх техникатын, тыыннаах күүһүн быраҕан туран, ыйтан ордук кимэн киирэ сатаабыта. Ол эрээри кыайбатаҕа. Саҥа эбии күүс кэлбитин кэннэ биһиги тыылга тахсыбыппыт. Онтон биһигн чааспытын III Белорусскай фроҥҥа өстөөх оборонатын тоҕу көтөн киирэр күүс оҥорбуттара. Алта сууккалаах кыырыктаах кыргыһыы түмүгэр биһиги фроммут өстөөх Витебскэйдээҕи группировкатын үлтү сынньан төгүрүйбүтэ. Өстөөх 70 тыһыынча саллааттара уонна офицердара билиэн ылыллыбыттарын туһунан дивизия хаһыатыгар суруллубутун аахпыппыт.
Витебскэйи босхолооһун кэнниттэн биһиги чааспыт Арҕаа Двина уҥа биэрэгинэн Полоцк диэки туһаайыынан барбыта. Мин манна разведкаҕа баран иһэммин минаҕа түбэспитим, уҥа атахпар улаханнык бааһырбытым. Аҕыс ый устата эмтээбиттэрэ. Онтон үһүс группа инбэлиит буолан, 1945 сыл кулун тутарга демобилизацияланан кэлбитим.
Аҕа дойду Улуу сэриитин кыттыылааҕа Тит Гуляев түөһүн Албан аат III степеннээх ордена уонна бойобуой медаллар киэргэтэллэр. хорсуннук сэриилэспитин бэлиэтинэн буолаллар.
Кини сэриилэһэр армияттан кэлээт үлэ үөһүгэр түспүтэ. Бу кэнники уон икки сыл устата Нам орто оскуолатын директорын хаһаайыстыбаннай чааска солбуйааччынан үлэлиир. Улахан оскуола хаһаайыстыбата улахан түбүктээх. Тит Афанасьевич күнүстэри-тууннэри үлэлиир диэтэххэ омуна суох буолуо. Бу уонтан тахса сыл устатыгар кыһынын араас кочегардар үлэлээтилэр. Сорохтор тоҥоро да сыспыттара элбэх. Ону куруутун хонтуруоллаан өрүһүйээччинэн хаһаайыстыбаннай чаас сэбиэдиссэйэ буолар.
Тит Афанасьевич үлэлиир кэмигэр оскуола материальнай базата хаҥаата, толору кабинетнай системаҕа киирдэ. Кини манна биллэр үтүөлээх-өҥөлөөх.
С. Ли-фу