РУБРИКАТОР
Кыһыл Сулус орден кавалера
Иван Тимофеевич Полищиков оччотооҕуга бэйэтэ эмиэ чэгиэн-чэбдик этэ, мэлдьи дьону кытта хаадьылаһан үөрүү аргыстаах сылдьара. Атын биригээдэлэртэн хаалымаары сыарҕалаах атынан бөһүөлэгинэн, өрүс арыыларынан олорор үлэһиттэрин кэрийэрэ. Сайынын ачарбаастаах сылдьан косилканан кырылаппыт, илиинэн охсон куһуйбут ходуһалары мээрэйдиирэ.
Кинилэр сэрии сотору бүтүө дии саныыллара, бастакы хомуурга барбыт табаарыстарын кэтэһэллэрэ. Онтукалара баара, күн ахсын немецкэй фашистар кимэн киирэн испиттэрэ. 1942 сыл бэс ыйыгар Хамаҕатта элбэх уолаттара армияҕа ыҥырыллар бэбиэскэни туппуттара. Оройуон киинигэр киирэн комиссияны барбыттара.
Таб. Полищиков бэс ыйын 25 күнүгэр биир дойдулаахтарын кытта төрөөбүт Хамаҕаттатын хаалларан армияҕа барбыта. Челябинскайга тиийэн саллаат синиэлин кэппитэ. Кылгас кэмҥэ маршевай ротаҕа бэлэмнэниини барбыта.
Онтон Калининскай Фронт 375-с дивизиятын састаабыгар ылыллан уот-кутаа ортотугар киирсибитэ. Ити дивизияҕа сахалар элбэх этилэр.
— Хамаҕаттаттан Жирков Иннокентий Васильевич, Үөдэйтэн Семен Ядреев, Никольскайтан Николай Рыкунов, оччотооҕуга I Хомустаах наспотугар бухгалтердыыр, билигин Намҥа олорор Ощепков Иван Яковлевич о. д. а. бааллара, — диэн ахтара кини.
Стрелковай рота атын взводтарыгар биир дойдулаахтара элбэх этилэр. Сарсыарда аһаан бүтээттэрин кытта инники кирбиигэ киирбиттэрэ. Иван Тимофеевич бэйэтэ кэпсииринэн, дьүүлэ-дьаабыта суох тыас-уус, иннилэрэ көстүбэт туман-буруо буолбут. Ити кини бастакы сүрэхтэниитэ.
— Өстөөх уот ардаҕын утары бокуойа суох кимэн испиппит. Ол иһэн көрдөхпүнэ Макаров Николай (Хамаҕатта), Макаров Дмитрий (Көбөкөн) уонна Чөккөөкү Миитэрэй (Салбаҥ) үһүөн биир пулемету сүгэн киирэн эрэллэрэ. Дьылҕалара хайдах буолбутун билбэтэҕим,— диэбитэ кини.
Хас да хонукка өстөөх буулдьатын утары киирбиттэр. Сороҕор бэрт бытааннык иннилэрин диэки сыҕарыйбыттар. Ардыгар өстөөх саба түһүүтуттэн чугуруйбуттар. Биирдэ Ядреев Семенныын араанньы буолбуттар. Иккиэн санчааска барбыттар. Кылгастык эмтэнээт, иккиһин фроҥҥа киирбиттэр.
Бу сырыыга рядовой таб. Полищиков биир дэриэбинэни ылыыга ыараханнык бааһырбыта. Снаряд оскуолката кинини илиитин, хараҕын таппыт. Госпиталга өр эмтэммитэ да, салгыы сэриилэһэр кыахтамматаҕа, аҥар хараҕын эппэрээсийэлээн ылбыттара. Онтон дойдутугар эргиллэн кэлэр.
Фронтовик И.Т. Полищикову Ленин аатынан колхоз председателэ И.Н. Бурнашев истиҥник корсүбүтэ, колхоз фондатыттаи көмөлөһөн сынньатан күүс-күдэх ылларбыта. Аҕыйах ый буолаат үүт табаарынай ферматын 3 №-дээх биригээдэтигэр биригэдьиирдэппитэ.
Иван Тимофеевич салайар биригээдэтэ Долоҕоноҕо (билиҥҥи бойня таһыгар) баара. Икки хотоҥҥо ыанньык ынахтар, борооскулар тураллара. Биригээдэ үүт ыамыгар бастыҥнар ахсааннарыгар киирсэрэ.
Кини суостаах күннэр тустарынан ыччаттарга үгүстүк кэпсиирэ. Сэриигэ ылбыт ыарахан бааһа доруобуйатыгар биллэр сабыдыалы оҥорбута. Кэнники күүһэ кыайарынан производствоҕа үлэлии сылдьан, бочуоттаах оынньалаҥҥа тахсыбыта.
Муус устарга Улуу Кыайыы 30 сыла туолуутугар аналлаах Аҕа дойду сэриитин ветераннарын слетугар кыттыбыта. Ветераннары кытта хаартыскаҕа түһүспүтэ. Бииргэ армияҕа ынырыллыбыт, сэриилэспит табаарыстарын керсон ааспыт суолларын ахтыспыттара. Буойун бойобуой сырыылара, дьулуурдаах үлэтэ правительственнай наҕараадаларынан бэлиэтэммитэ. Кыһыл Сулус орденнаах, хас да медаллаах.
В. ЕРЕМЕЕВ