РУБРИКАТОР
Ядреев Иван Николаевич
(1914-1983 сс.)
Наҕараадалара: Аҕа дойду сэриитин II степеннээх уордьана; «Кыһыл Сулус» уордьана; «Бойобуой үтүөлэрин иһин» мэтээл; «Берлини ылыы иһин» мэтээл; «1941-1945 сс. Аҕа дойду сэриитигэр Германия-ны кыайыы иһин» мэтээл; Юбилейнай мэтээллэр.
Миигин Таатта оройуонугар үлэлии сырыттахпына, атырдьах ыйын 10 күнүгэр 1941 с. армияҕа ыҥырбыттара. Оччолорго мин сир салаатыгар кылаабынай зоотехнигынан үлэлиирим.
Үрдүкү Кылаабынай Командование 23-с Богдан Хмельницкэй уонна «Кыһыл Сулус» уордьаннаах Тернопольскай, Берлинскэй зенитно-артиллерийскай саппаас дивизиятыгар зенитчик быһыытынан сэриини ааспытым. Биһиги дивизиябыт төрөөбүт дойдубут киинигэр Москваҕа хомуллубута. Биһиги олус ыарахан сэрии суолларын ааспыппыт: Старай Русса анныгар сэриилэспиппит, Днепри туораабыппыт, Орловско-Курскай Тоҕой иэдээннээх уотун курдаттаабыппыт, Украинаҕа Киевы, Житомиры, Тернополы, Львовы босхолоспуппут, Польшаны уҥуордаабыппыт, Берлины, Дрездены штурмалаабыппыт. Кыайыы күнүн мин Дрезден куоракка көрсүбүтүм, онтон 1945 с. алтынньы ыйыгар эрэ Австрия столицата Вена куоратыгар сылдьан дойдубар демобилизацияламмытым.
Мин бойобуой сырыым, сулууспам иһин «Аҕа дойду сэриитин II степеннээх», «Кыһыл Сулус» уордьаннарынан уонна 10 мэтээлинэн наҕараадаламмытым. Ол мэтээллэр истэригэр «Бойобуой үтүөлэрин иһин», «Берлины ылыы иһин» мэтээллэр бааллар.
Армияттан кэлээт да, сэрии урусхалларыттан эмсэҕэлээбит норуот хаһаайыстыбатын чөлүгэр түһэриигэ, өрөспүүбүлүкэтин тыатын хаһаайыстыбата салгыы сайдыытыгар үлэлээн барбытым. Ол курдук, сүүрбэччэ сыл Саха АССР тыатын хаһаайыстыбатын Министерствотыгар зоотехнигынан уонна кадр отделын начальнигынан, кэлин Өлүөхүмэ оройуонугар ССКП райкомун инструкторынан үлэлээбитим.
Эйэлээх кэм эйгэтигэр үлэлээбит сылларым икки правительственнай мэтээлинэн, 3 Саха АССР Үрдүкү сэбиэтин Бочуотунай грамоталарынан бэлиэтэммитэ, «Саха АССР үтүөлээх зоотехнига» аат иҥэриллибитэ.
И. Н. Ядреев