26.09.2023

«Тыа сирин күүстээх үлэтин үөһүгэр» кинигэ

Балаҕан ыйын 2 күнүгэр, Нам улууһугар тыа хаһаайыстыбатын сайдыытын сырдатар “Тыа сирин күүстээх үлэтин үөһүгэр” кинигэ М.К. Аммосов аат. култуура уонна духуобунай сайдыы дыбарыаһыгар үөрүүлээх быһыыга-майгыга буолан ааста.
Кинигэ улуус дьаһалтатын үбүлээһининэн 100 экземпляр тиражтаах, 488 сирэйинэн Дьокуускайдааҕы “Көмүөл” кинигэ кыһатыгар бэчээттэнэн таҕыста. Манна Нам оройуонун тыатын хаһаайыстыбатын 1950-с сыллартан саҕалаан күн бүгүҥҥэ диэри үлэһит дьонун, коллективнай, советскай, тэрээһиннээх хаһаайыстыбаларын үлэҕэ кыайыылара сырдатылынна.
Кинигэ 7 түһүмэхтэн турар.
Кинигэни П.И. Сивцев аатынан Намнааҕы история уонна этнография музейын киновидеоархыыбын сэбиэдиссэйэ Вера Дмитриевна Попова түмэн, сааһылаан оҥордо.
Тэрээһини салайан ыытта Майя Романовна Софронова Намнааҕы киин библиотека салайааччыта. Кыттыылаахтары эҕэрдэлээтилэр уонна наҕараадалары туттардылар Алексей Еремеев, Александр Атласов, Юрий Слепцов, улуустааҕы тыа хаһаайыстыбатын управлениетын начальнига Владимир Макаров.
Модут нэһилиэгин баһылыга Ефим Гоголев, Хамаҕатта нэһилиэгин баһылыга Евгений Ушницкай дириҥ ис хоһоонноох кинигэ күн сирин көрбүтүнэн эҕэрдэ тылларын анаатылар уонна кинигэ тахсыытыгар үлэлэспит нэһилиэктэрин дьонун наҕараадалаатылар.
Улууспут тыатын хаһайыстыбатын управлениетын араас сылларга салайбыт Иннокентий Федоров, Владимир Алексеев, Ефим Гоголев уонна билигин иилии-саҕалыы сылдьар Владимир Макаров бэлиэ түгэнинэн эҕэрдэлээн туран, бэлэхтэрин анаатылар.

Кинигэ тахсыытыгар үгүс сыраларын биэрбит кыраайы үөрэтээччилэр, кинигэ геройдара истиҥ ахтыылары оҥордулар.
Эҥсиэли хочотун туруу үлэһит дьонун бэриниилээх үлэлэрин үйэтитэр кинигэ күн сирин көрбүтүнэн эҕэрдэлиибит!



Мы используем cookie-файлы для наилучшего представления нашего сайта. Продолжая использовать этот сайт, вы соглашаетесь с использованием cookie-файлов.
Принять