Автор: 
Сылдьар ыалдьыкка сырдыгынан сыдьаайар, бастыҥ ааҕааччылардаах, олоҕу кытта тэҥҥэ хардыылыыр Бөтүҥ нэһилиэгин олохтоох модельнай библиотеката 70 сааһын туолла.
Бөтүҥ нэһилиэгэр билиигэ –көрүүгэ, ааҕыыга уһуйуу ааҕар балаҕантан саҕаламмыта. Нэһилиэккэ библиотека 1952 сыллаахха арыллыбыта. Бастакы библиотекарынан Егор Егорович Слепцов үлэлээбитэ. 1974 сыллаахха библиотека Намнааҕы библиотечнай ситим филиала буолбута. Хас биирдии нэһилиэк сайдыытыгар билиигэ-көрүүгэ билии киинэ библиотека улахан суолталаах. Бибилэтиэкэ билиини-көрүүнү иҥэрэр, иитэр-үөрэтэр кыhа буоларын үлэhиттэр таhымнара туоhулуур. Бу кыhаҕа үлэлэригэр бэриниилээх, үрдүк билиилээх бибилэтиэкэрдэр үлэлээн хамсаан ааспыттара. Кинилэр ааттарын нэһилиэк дьоно сэргэтэ үтүө тылларынан ахталлар, саныыллар. Ол курдук бэйэлэрин идэлэрин толору баһылаабыт библиотекардар Максимова Екатерина Николаевна, Васильева Валентина Ивановна, Сивцева Екатерина Васильевна, Оконешникова Матрена Петровна, Кайгородова Любовь Сергеевна, Тастыгина Айталина Васильевна, Оконешникова Александра Михайловна, Суздалова Любовь Дмитриевна, Семенова Сардана Николаевна үтүө суобастаахтык үлэлээбиттэрэ.
Үгүс сылларга 1959 сылтан 1972 сылга диэри Бөтүҥ библиотекатыгар Аҕа дойду сэриитин, Ленинград блокадатын кыттыылааҕа, Ядрихинская Татьяна Кондратьевна сэбиэдиссэйинэн үлэлээбитэ. Бу үлэлиир сылларыгар кини нэһилиэк олохтоохторо сайдыылаах, билиилээх көрүүлээх буолалларын туһугар, бары сыратын ууран үлэлээбитэ.
Библиотека үөрүүлээх үбүлүөйдээх күнүн тэрээһинэ Ефрем Степанович Сивцев – Таллан Бүрэ аатынан орто оскуола үөрэнээччилэрин хоһоонунан дьүһүйүүтүттэн саҕаланна.
Ол кэннэ урукку сылларга сэбиэдиссэйинэн үлэлээбит Матрена Петровна Оконешникова, Сардана Николаевна Семенова үлэлээбит кэмнэрин туһунан истиҥ ахтыы оҥордулар. Тэрээһини ылбаҕай ырыаларынан «Күбэйэ” вокальнай коллектив киэргэттилэр. Билигин үлэлии сылдьар Валентина Спиридоновна Колесова бииргэ үлэлэһэр тэрилтэлэригэр, активист дьонугар-сэргэтигэр махтал суруктары туттартаата.
Библиотека үбүлүөйдээх күнүнэн «Бөтүҥ нэһилиэгэ” МТ баһылыгын солбуйааччыта Галина Прокопьевна Маркова, улуустааҕы Культура уонна духуобунай сайдыы управлениетын начальнига Елена Александровна Заровняева, Намнааҕы кииннэммит библиотечнай ситим директора Майя Романовна Софронова, нэһилиэктэр библиотекаларын сэбиэдиссэйдэрэ, орто оскуола директора Заровняев Роман Алексеевич, “Сардаана” уһуйаан сэбиэдиссэйэ Иванова Елизавета Васильевна, Семен Петрович Оконешников аатынан “Айылгы” культурнай киин директора Винокурова Ирина Семеновна, нэһилиэкпит общественнай түмсүүлэрин салайааччылара Александра Афанасьевна Соловьева, Матрена Николаевна Рожина истиҥ эҕэрдэлэрин тиэртилэр, өйдөбүнньүк бэлэхтэрин туттардылар.
Мустубут ыалдьыттар толору астаах сандалы тула олорон, ирэ-хоро кэпсэтэн, оонньууларга кыттан дуоһуйа сынньанан тарҕастылар.
Бу курдук билии-көрүү аартыгын арыйар Бөтүҥ олохтоох модельнай библиотекатын юбилейа үрдүк таһымнаахтык ааста.
