Автор: 
Н.М.Рыкунов аатынан киин библиотека ааҕар саалатыгар, Төрөөбүт тыл уонна сурук бичик күнүгэр күн сирин көрбүт салайааччы уонна суруйааччы Россия Суруналыыстарын, СӨ Суруйааччыларын сойуустарын чилиэнэ, поэт, СӨ Олох-дьаһах хаһаайыстыбатын бочуоттаах үлэһитэ, Нам, Кэбээйи улуустарын, Көбөкөн, Хатырык, Хамаҕатта нэһилиэктэрин Ытык Киһитэ Андрей Григорьевич Кобяков 80 сылын бэлиэтиир ахтыы күнэ буолан ааста. Ахтыы күммүтүгэр “Нам улууһа” МТ баһылыгын солбуйааччыта Юрий Вячеславович Дьяконов, улууска баһылыгынан үлэлээбит Дмитрий Панкратьевич Корякин, Намкоммунтеплоэнерго АО тэрилтэ генеральнай директора Николай Васильевич Игнатьев, «Эҥсиэли» хаһыат кылаабынай редактора Лена Алексеевна Ноговицына, “Отуу уота” литературнай, “Туллук хаара” ырыа айаччылар түмсүүлэрэ, Андрей Григорьевич тапталлаах кэргэнэ Софья Дмитриевна Кобякова, оҕолоро, аймахтара, бииргэ алтыспыт, үлэлээбит доҕотторо, үөлээннээхтэрэ кыттыыны ыллылар. Кэлбит ыалдьыттар үтүө киһибит олорон ааспыт дьоһун олоҕун, үлэлээбит үтүмэн үлэтин, суруйан-бичийэн хаалларбыт кинигэлэрин тула сырдык санаанан, истиҥ-иһирэх тылларынан ахтан-санаан ыллылар. Суруйааччы айар үлэтигэр сирдээҕи олох кэрэтин, Сахабыт сирин айылҕатын дьикти көстүүлэрин, туруу үлэһит дьонун-сэргэтин уратытык хоһуйбут айымньыларыттан хас да хоһооно уостан түспэт ырыа буолан ыллана сылдьаллар. Андрей Кобяков тыл., Андрей Замятин мел. «Хатырык» диэн ырыатын Афанасий Татаринов ыллаан дьон-сэргэ сүргэтин көтөхтө. Андрей Григорьевич үтүө майгытын-сигилитин, судургута суох хорсун-хоодуот олоҕун, чугас дьонун таптыырын, араҥаччылыырын, доҕотторун дириҥник убаастыырын туһунан тыл эппит дьоммут бэлиэтээн эттилэр. Ити курдук ахтыы күммүт олус истиҥник-иһирэхтик буолан ааста.
