23.05.2022

«Эйгэ» саҥа көлүөнэ библиотека: үлэ саҥа хайысхата кэҥиир

“Култуура” национальнай бырайыак иитинэн саҥардыллыбыт Бастакы Хомустаах  нэһилиэгин  «Эйгэ» сана көлүөнэ библиотеката кулун тутар ыйтан аһыллан үлэлии олорор. Федеральнай таһымнаах 180 кв. иэннээх модельнай библиотека тас көрүҥэ үп-харчы тиийбэтинэн оҥоһуллубакка турбута. Биир дойдулаахпыт “Таргет” ХЭТ салайааччыта Тимофеев Никита Семенович 120 тыһ. харчыны көмө оҥорон библиотека тас өттүн тупсарыы үлэтэ саҕаланна. Н.М.Рыкунов аатынан улуустааҕы киин библиотека биригээдэтэ: Егор Миронов, Роман Заровняев, Гаврил Гаврильев, Сергей Неустроев, Александр Захаров, Алексей Журавлевич нэдиэлэ устата үлэлээн, үс эркини аныгы матырыйаалынан хаачыстыбалаахтык бүрүйэн оҥордулар.

Аны кэлэр сылга ситэрии үлэтэ, ону таһынан сайыҥҥы ааҕар былаһаакка, кинигэ фондатын харайар анал сир, күрүө-хаһаа оҥоһуллара былааннанар.

      “Эйгэ” саҥа көлүөнэ библиотеката түөрт сүрүн зонаҕа арахсар: кыраайы үөрэтэр “Айылгы”, элбэх функциялаах “Ситим” ааҕар саалалар, эдэр ыччаттарга аналлаах “Үрдэл” коворкинг киин уонна оҕолорго аналлаах “Үнүгэс” ааҕар былаһаакка. Библиотека иһинэн түөрт интэриэстэринэн кулууптар тэриллэн үлэлииллэр: “Төлөн” литературнай түмсүү, “Толбон” интеллектуальнай кулууп, оҕолорго аналлаах “Ай+тал” айар куруһуок, “Үктэл” дьиэ кэргэнинэн ааҕыы түһүлгэтэ. Ону таһынан “Үйэлээх суруйааччылар, үйэлээх айымньылар”, “Аптаах холбука”, “Ааҕар түһүлгэ”, “Книжный сад” сайыҥҥы ааҕар лааҕыр, “Хомустаах читает”, “Библиотечный май”  бырайыактар чэрчилэринэн культурнай-маассабай тэрээһиннэр библиотека эрэ иһинэн буолбакка куйаар ситиминэн ыытылла тураллар. Араас хабааннаах аахсыйаларга, виртуальнай уруоктарга, быыстапкаларга, маастар кылаастарга, төгүрүк остуолларга оҕо-аймах, дьон-сэргэ сөбүлээн кытталлар. Билиҥҥи сайдыылаах кэмҥэ библиотекабыт үлэтигэр саҥа хайысхалар хото киирэллэр. Ол курдук эргэ хаһыаттартан ыстатыйалар, хаартыскалар тиэмэлэринэн наарданан аныгы бырагыраамма өҥөтүнэн электроннай тиһиликкэ хараллаллар. Нэһилиэнньэ олохтоохторугар ксерокс, сканирование, ламинат өҥөлөрүн оҥоробут, тиэкистэри бэчээттиибит. Саастаах дьону электроннай почтанан  туһанарга, компьютерынан үлэлииргэ, оскуола оҕолоругар презентация, слайд оҥорорго сүбэлэри биэрэбит. Информационнай эйгэ өҥөтүнэн нэһилиэк олохтоохторо эрэ буолбакка, республика араас муннуктарыттан куйаар ситимин нөҥүө туһанааччылар күннэтэ элбээн иһэллэр.

Библиотекабыт аһыллыаҕыттан араас улуустартан биир идэлээхтэрбит кэлэн үлэбитин-хамнаспытын билсэн, опыт атастаһан бараллар, семинардар тэриллэн ыытыллаллар. Биһиги норуот нэһилиэстибэтин сырдатааччы буоларбыт быһыытынан олох тэтиминэн тэҥҥэ сайдабыт, үлэлиир миэстэбит аныгы кэм ирдэбилигэр эппиэттиир буоларын туһугар бары биир санаанан, сүбэнэн үлэлиибит.

Барҕа махтал тылларын “Нам улууһа” МТ аҕа баһылыгар Слепцов Ю.И., улуустааҕы киин библиотекабыт директорыгар Софронова М.Р., “Хомустаах 1-кы нэһилиэгэ” МТ  баһылыгар Жирков В.Г., уонна сүрүн спонсорбытыгар Тимофеев Н.С. тиэрдэбит. Эһиэхэ баҕарабыт тус олоххутугар, үлэҕитигэр этэҥҥэ буолууну, кэнчээри ыччаппыт туһугар саҥаттан саҥа сүүрээннэри олоххо киллэрэн дьон-сэргэ биһирэбилин, ытыктабылын, махталын ыла туруҥ!

Надежда Жиркова, Лариса Сивцева

“Эйгэ” сана көлүөнэ библиотека специалистара