19.03.2024

«Өлбөт үйэлээх Максим» саҥа кинигэ сүрэхтэннэ

Бэс ыйын 14 күнүгэр Национальнай библиотека Историческай саалатыгар «Бессмертный Максим» («Өлбөт үйэлээх Максим») кинигэ-альбом бэчээттэнэн тахсыбытын сүрэхтиир дьоро күн буолла. Саҥа кинигэ Саха Автономията төрүттэммитэ 100, М.К.Аммосов төрөөбүтэ 125 үбүлүөйдээх сылларыгар ананан таҕыста. Уопсай ахсаана 1500 экз. Национальнай библиотека электроннай бэчээттиир киинигэр таҥыллан оҥоһуллубут.
Киирии тылы “Нам улууһа” МТ баһылыгын солбуйааччыта, кинигэ бырайыагын ааптара, редактора Игнатьева Мария Семеновна саҕалаата. Кини махтал тыллары кинигэҕэ үлэлэспит, хомуйан таһаарбыт Дьокуускай куорат муниципальнай архыыбын докумуоҥҥа уонна информационнай өҥөҕө отдел салайааччыта Айталина Афанасьевна Захароваҕа уонна СР Национальнай архыыбын директорын солбуйааччыта Наталья Николаевна Малышеваҕа, Национальнай библиотека кэлэктиибигэр анаата.
Ааптардар Айталина Захарова, Наталья Малышева кинигэҕэ хайдах үлэлэспиттэрин туһунан сиһилии кэпсээтилэр. Бу кинигэ ураты ис хоһоонноох, урукку Максим Аммосовка ананан тахсыбыт кинигэлэртэн олох туспа көстүүлээх, тутуллаах, ахтыылар хомуурунньуктара, фотоальбом да буолбатах диэн бэлиэтээтилэр уонна билиҥҥи кэмҥэ сөп түбэһэр саҥалыы тыыннаах буолан, ордук эдэр дьоҥҥо интэриэһинэй, үйэлээх кинигэ буолуо диэн санааларын эттилэр. Чахчыта да, ааптардар Максим Аммосовка, кини дьиэ кэргэнигэр убаастабыл, өйдөбүл, сүгүрүйүү бэлиэтигэр өйдөрүн-санааларын, дууһаларын ууран туран, сыралаһан үлэлэспиттэрин түмүгэр олус дириҥ ис хоһоонноох, улахан кинигэ таҕыста.
Кинигэ тула санааларын үллэстэн тыл эттилэр СР үтүөлээх юриһа, ХИФУ профессора Александр Ким-Кимэн, Ил Түмэн мунньаҕын председателин солбуйааччыта Александр Жирков көмөлөһөөччүтэ Валентина Бочонина, учуонайдар Егор Антонов, Людмила Иванова, Национальнай библиотека директора Саргылана Максимова, М.К.Аммосов аатынан СР Государственноһын историятын музейын научнай үлэһитэ Станислав Дьяконов, Хатырык нэһилиэгэ муниципальнай тэриллии баһылыга Юрий Дьяконов, Нам түмсүү салайааччыта Гаврил Местников, СР үтүөлээх учуутала, М.К.Аммосов сиэн балта Я.Е.Корякина. Тэрээһини ХИФУ журналистика кафедратын сэбиэдиссэйэ, доцент Олег Сидоров ыытта.
Национальнай библиотека директора Саргылана Васильевна Максимова эппитин курдук, кинигэ икки сыл устата бэлэмнэнэн, Национальнай библиотека электроннай бэчээттиир киинин бастакы улахан таһаарыыта буолла. Кинигэ ис-тас көстүүтүн, оһуорун-мандарын чочуйан оҥорбут эдэр дизайнердар Н.Игнатьева, О. Камшилина ааптардары кытта биир санаанан үлэлээн, бэйэлэрин идеяларын киллэрэн, боччумнаах бырайыагы оҥорон, дьон-сэргэ махталын, сэҥээриитин ылыан ыллылар. Бу кинигэ республика бары библиотекаларыгар тарҕаныаҕа, онон ааҕааччылар дьоһун, сонун, интэриэһинэй кинигэни ааҕан, билсэн Максим Кирович Аммосов туһунан өссө элбэҕи билиэхтэрэ диэн эрэнэбит.

Мы используем cookie-файлы для наилучшего представления нашего сайта. Продолжая использовать этот сайт, вы соглашаетесь с использованием cookie-файлов.
Принять