Автор: 
Кулун тутар 12 күнүгэр Национальнай библиотека историческай саалатыгар биир дойдулаахпыт, поэт, СӨ Суруйааччыларын сойууһун чилиэнэ, Нам улууһун култууратын бочуоттаах үлэһитэ, Партизан нэһилиэгин Ытык киһитэ Анна Парникова-Сабарай Илгэ «Күһүҥҥү ыһыаҕым» кинигэтин сүрэхтиир дьоро күнэ, поэзия түһүлгэтэ өрө көтөҕүллүүлээхтик биир тыынынан буолан ааста.
Бэлиэ түгэни Н.М. Рыкунов аатынан Нам модельнай библиотекатын коллектива уонна Анна Парникова-Сабарай Илгэ бииргэ төрөөбүттэрэ тэрийэн ыыттылар. Национальнай библиотека краеведческай салаата (сэб. Кычкина Л.И.) кинигэ быыстапкатын туруорбутун кэлбит дьон сэргээн көрдүлэр.
Тэрээһини Н.М. Нам библиотекаларын кииннэммит ситимин дириэктэрэ Майя Софронова киирии тылынан арыйда. Саха норуодунай бэйиэтэ, Саха сирин Суруйааччыларын сойууһун бэрэссэдээтэлэ Наталья Харлампьева дьоро күнү иилээн-саҕалаан ыытта. Кини Сабарай Илгэ айар үлэтин туһунан тус санааларын үллэһиннэ, бииргэ көрсүбүт түгэннэрин кэпсээтэ.
Кинигэ ис тутулун туһунан Н.М. Рыкунов аатынан Нам модельнай библиотекатын библиограба Раиса Гоголева билиһиннэрдэ. Саҥа кинигэҕэ Анна Парникова 2015 сыллаахха бэчээттэнэн тахсыбыт «Күһүҥҥү ыһыаҕым» кинигэтигэр киирбит хоһооннорун сэргэ, үгүс бэчээккэ тахсыбатах айымньылара ааҕааччы билиитигэр таҕыстылар. Кинигэ аата уларыйбакка, ааптар бэйэтэ ааттаан хаалларбытынан ааҕааччы киэҥ араҥатыгар ананан күн сирин көрдө. Кинигэ 500 ахсаанынан «Алаас» кинигэ кыһатыгар бэчээттэннэ.
Сабарай Илгэ бииргэ төрөөбүт балта, Хамаҕатта нэһилиэгин «Түһүлгэ» сынньалаҥ киинин дириэктэрэ, СӨ култууратын туйгуна Антонина Харитонова эдьиийин олоҕун, айар үлэтин уонна кинигэ күн сирин көрүүтүн туһунан олус долгуйан туран истиҥник билиһиннэрдэ.
Сабарай Илгэ бииргэ төрөөбүт быраата, Намнааҕы баһаарынай сулууспа салаатын салайааччыта, хапсаҕайга СӨ спордун маастара Николай Парников, балта, В.П. Артамонов аатынан саха-француз лиссиэй дириэктэрэ Юрчана Парникова, кийииттэрэ Саргылана Юшкова, Надежда Парникова, күтүөтэ Семен Алексеев эдьиийдэрин хоһооннорун олус иэйиилээхтик, долгуйан туран аахтылар.
Бэлиэ түгэҥҥэ поэт, Россия, Саха сирин Суруйааччыларын сойуустарын чилиэнэ, СӨ култууратын үтүөлээх үлэһитэ, кинигэ аан тылын суруйбут, Анна Парникова чугас дьүөгэтэ Ольга Корякина-Умсуура, педагогическай наука дуоктара, профессор Евдокия Поликарпова, бэйиэт Ангелина Шадринова-Суоһааны, «Саха» НКИХ ыытааччыта, редактора Георгий Белоусов Сабарай Илгэ поэзия киэҥ эйгэтигэр хайдахтаах курдук ураты буочардаах, хомоҕой тыллаах бэйиэт буолан олорон ааспытын, олоҕун бүтүннүү поэзияҕа, айар үлэҕэ анаабыт «үрдүкү поэзия» уһулуччулаах маастара буоларын ырытан, ахтан-санаан аастылар.
Анна Парникова тапталлаах Бартыһаанын дьонун-сэргэтин аатыттан нэһилиэк баһылыга Алексей Зырянов эҕэрдэ тылын тиэртэ уонна кинигэҕэ үлэлэспит дьоҥҥо эҕэрдэ суруктары, сибэкки дьөрбөтүн туттарда. Нам улууһун «Отуу уота» литературнай түмсүү чилиэнэ Мария Мохначевская-Марта-Мария Сабарай Илгэҕэ анаабыт хоһоонун аахта.
Ханнык баҕарар поэт хоһооннорун уустаан-ураннаан, иэйэн-куойан аахтахтарына дьон дууһатын кылын таарыйар, долгутар. Дьоро күҥҥэ Сабарай Илгэ айар үлэтин сүгүрүйээччитэ Наталья Афанасьева – Захарова поэт хоһооннорун ис сүрэхтэн иэйиилээхтик ааҕан саалаҕа мустубут дьоҥҥо итэҕэтиилээхтик тиэртэ.
Анна Парникова-Сабарай Илгэ курдук ураты тыыннаах суруйааччылар баалларын тухары, кини хоһооннорун ис дьиҥэр сүгүрүйэр ааҕааччылардаах буоллаҕына Поэзия өлбөт тыыннаныа. Поэт суруйан хаалларбыт хоһоонноро, ылбаҕай ырыалара үйэттэн үйэҕэ ааҕылла, ыллана туруохтара, бэйэтин ааҕааччыларын булуоҕа диэн эрэнэбит!
Тэрийээччилэр ааттарыттан кыттыыны ылбыт суруйааччыларбытыгар, ыалдьыттарбытыгар Анна Парникова-Сабарай Илгэ туһунан истиҥник санаан-ахтан ылбыккытыгар махтанабыт. Сабарай Илгэ саҥа кинигэтин илиитигэр ылан, хас биирдии лииһин арыйан хоһоон хонуутугар киирэн, иһийэн, налыйан олорон чуумпутук ааҕан, хас биирдиибит поэт эппитин, бэйэтэ ис туругар хайдах ылынарынан толкуйдаан, анааран бу кинигэттэн элбэххэ үөрэниэ, тус олоҕор туһаныа диэн баҕа санаабын тиэрдэбит.
Матырыйаалы бэлэмнээтэ Раиса Гоголева
