19.10.2021

“Алантай Боотур” олоҥхо кинигэтин сүрэхтэниитэ

“Алантай Боотур”   олоҥхо кинигэтин сүрэхтэниитэ

Нам улууһа  былыр былыргыттан кэрэ  кэпсээҥҥэ, ыллам ырыаҕа, номоххо киирбит ырыаһыт ымыылардаах, чуор куоластаах, ууну сомоҕолуур уус тыллаах кэрэ мааны  дьонунан биллэр.  Бу күннэргэ, кулун тутар 18 күнүгэр П.П. Ядрихинскай – Бэдьээлэ аатынан Олоҥхо  дьиэтигэр   ССРС суруйааччыларын Союһун чилиэнэ, норуот ырыаһыта, олоҥхоһут Егор Герасимович Охлопков-Буоратай  “Алантай Боотур” диэн  олоҥхото “Бичик” кинигэ кыһатыгар  “Саха боотурдара” серияҕа  Эҥсиэли олоҥхоһуттарыттан аан бастакынан киирбит   үйэлээх кинигэтин сүрэхтиир истиҥ-иһирэх күнэ  бэрт  тэрээһиннээхтик буолан ааста.  Бу тэрээһини  Олоҥхо  дьиэтин үлэһиттэрэ уонна Н.М.Рыкунов аатынан Намнааҕы киин библиотека ааҕааччыны кытта үлэлиир отдела иилээн-саҕалаан ыыттылар.   Дьокуускай куораттан кыттыыны ыллылар: Илларионов Василий Васильевич – фольклорист, филологическай наука доктора,  профессор,  Хотугулуу — Илиҥҥи норуоттар тылларын уонна култуураларын институутун фольклор кафедратын сэбиэдиссэйэ; Лугинова Анастасия Михайловна – Культура уонна Духуобунай сайдыы министерствотын үлэһитэ; Сысолятина Зоя Григорьевна – Өксөкүлээх Өлөксөй аатынан норуоттар доҕордоһууларын дьиэтин иһинэн СР норуоттарын культурнай нэһилиэстибэтин киинин сүрүннүүр үлэһитэ;  Флегонтова Ульяна Михайловна — Өксөкүлээх Өлөксөй аатынан норуоттар доҕордоһууларын дьиэтин иһинэн СР норуоттарын культурнай нэһилиэстибэтин киинин сүрүннүүр үлэһитэ; Протодьяконова Елена Николаевна – Республикатааҕы Олоҥхо киинин научнай сотруднига,  Олоҥхо ассоциация общественнай түмсүүтүн эппиэттиир секретара.

Саҥа кинигэ тула олус истиҥ-иһирэх, сэргэх кэпсэтии буолла.  Сүдү айымньы —  Олоҥхо    үөрэтиллэригэр, чинчийиитигэр  араас санаалар, этиилэр киирдилэр.  Олоҥхо өссө үрдээн-үүнэр кэрдиис кэмҥэ тахсарыгар хас да өттүттэн үлэ барыахтааҕын ыалдьыттарбыт тоһоҕолоон эттилэр.  Нам улууһун олоҥхоһуттарын СР культуратын туйгуна Ульяна Дмитриевна Сивцева үөрэтэн, түмэн “Эҥсиэли хочотун олоҥхоһуттара” диэн кинигэни бэчээттэппитэ, онтон олоҥхону ыллаан-туойан, кэнчээри ыччаты олонхого  уһуйар учуутал Елена Константиновна Иванова буолар. Кинилэр сыралаах үлэлэрин ыалдьыттарбыт  үрдүктүк сыаналаатылар.

Егор Герасимович Охлопков – Буоратай туһунан, кинини кытта алтыспыт дьон кэлэн истиҥник  ахтан – санаан  тарҕастылар. Буоратай     олоҥхото аан бастаан  кинигэ буолан күн сирин   көрдө,  ити курдук  кини  олоҕун,  олоҥхотун  улуус  дьоно-сэргэтэ эрэ буолбакка, бүтүн саха дьоно үөрэтиэ-билиэ турдаҕа.  Буоратай аймаҕа Семен Иванович Охлопков үөрэхтээх киһи буолан былыр төрүччү оҥорбутун, балтылара Анна Егоровна Охлопкова салҕаан – ситэрэн биэрбитин кэпсээтэ. Түмүгэр саха норуотун биир бастыҥ айымньытын, Олоҥхону, дьон-сэргэ ортотугар тарҕатааччыларга, үөрэтээччилэргэ, чинчийээччилэргэ, ыалдьыттарбытыгар  махтал тыллара этилиннилэр, аймахтара махтал суруктары  туттардылар. Егор Герасимович Охлопков – Буоратай саҥа кинигэтин,  хас биирдии ыалдьыкка Фрунзе нэһилиэгин аҕа баһылыга Ядрихинскай Иван Гаврильевич бэлэх уунан үөрэн-көтөн, илии тутуурдаах, өттүк харалаах тарҕастыбыт.

Наталья Павлова,  ааҕааччыны кытта үлэлиир отдел библиотекара.