Автор: Олунньу ый 11 күнэ Нам улууһун кииннэммит библиотечнай ситим үлэһиттэригэр олус таһаарыылаах эппиэтинэстээх күн буолла. Ол курдук билии-көрүү сырдык кыымын ыһыахтыыр, сырдыкка-кэрэҕэ угуйар, нэһилиэнньэни түмэр, сомоҕолуур, кинигэни саҥа ылар кырачаан киһиттэн, аҕам саастаах дьоммутугар тиийэ ааҕар, тэрээһиннэргэ сылдьар улуустааҕы киин библиотека 2025 сыллаах түмүктүүр үлэбитин көрдөрөр, санаа үллэстэр, 2026 сыллаах үлэ торумун кэпсэтэр «2025 сыл түмүктэрэ уонна 2026 сылга былааннар: саҥа саҕахтар» семинар күммүт Хатыҥ-Арыы нэһилиэгэр ааста.
Күн иккис аҥарыгар эстрада судаарыстыбаннай тыйаатырыгар «Айар» национальнай кинигэ кыһата сыл литературнай түмүктэрин («Сыл бастыҥнара») билиһиннэрэр, эҕэрдэлиир дьоро тэрээһинигэр ыҥырыылаах ыалдьыт буолан кыттыыны ылан кэллибит. Бу сылга «Айардар» тэрээһиннэрин 100 сылын бэлиэтээһин чэрчитинэн уонна Төрөөбүт тыл, сурук-бичик күнүн көрсө ыыттылар. Ааспыт сыллааҕы үлэни түмүктүүр «Айардыын бииргэ» олус дириҥ ис хоһоонноох тэрээһиҥҥэ төрөөбүт тылы харыстааһыҥҥа, ааҕыыны сайыннарыыга тиһиктээхтик, таһаарыылаахтык үлэлиир, үлэлэһэр дьон, бастыҥ ааптардар, ааҕааччылары, кыһаны кытта үлэлэһэр бибилэтиэкэлэр, култуура эйгэтин үлэһиттэрэ о.д. а. түмсүбүттэр.
Дьоро күн «Айар» национальнай кинигэ кыһатын генеральнай дириэктэрэ Август Егоров эҕэрдэтиттэн саҕаланна уонна долгутуулаах анал ааттарга лауреаттары чиэстээһин, наҕараадалааһын сиэрэ-туома, дохсун ытыс тыаһын доҕуһуолугар ааста.
Анал ааттары ыллылар:
Ийэ тылы, суругу-бичиги туруулаһааччы: Жирков А.Н.
Ийэ тыл, сурук-бичик туруу үлэһитэ: Карманова С.Е.
Саамай ааҕар улуус: Мэҥэ Хаҥалас улууһа
Дархан кинигэ: «Ньырбакаан». Дьолуолаах-Пономарев Д.Н.
Бастыҥ проза кинигэтэ: «Кимиэхэ да этимэ!», Корякина С.А.- Сардаана
Ааҕааччы биһирэбилэ: «Хамначчыт кыыс дьылҕата», Гоголев В.И.-Уйулҕан
Далааһыннаах ааптар: Иринцеева Е.С.- Огдо
Оҕо бастыҥ кинигэтэ: «Минньигэс түүл остуоруйалара», Корякина Р. — Хотууна
Бастыҥ үөрэх кинигэтин ааптара: М.Е. Охлопкова, «Букубаар» ааптара
Бастыҥ оонньотор таһаарыы: «Балыксыт Олломолон» (Рыбак), Павлова А.Ф., Прокопьева М.М.
Бастыҥ сайыннарар таһаарыы: «Кыайыы» историческай лотуо, Бочкарева Ф.Ю.
Бастыҥ уруһуйдьут: Егорова Алина
Бастыҥ партнер: киэҥ эйгэҕэ сырдатааччы — СӨ ГАУ «Сахабэчээт»
Бастыҥ партнер: бииргэ үлэлэһээччи — Ю.А. Гагарин аатынан типография
Бастыҥ партнер: ааҕыыны көҕүлээччи (бибилэтиэкэ): Горнай улууһун киин бибилэтиэкэтэ, дириэктэр Иванова Анна Владимировна
Бастыҥ партнер: ааҕыыны көҕүлээччи (бибилэтиэкэ), 1 ист. диплом: Уус Алдан улууһун киин бибилэтиэкэтэ, дириэктэр Павлова Лена Семеновна
Бастыҥ партнер: ааҕыыны көҕүлээччи (бибилэтиэкэ), 2 ист. диплом: Дьааҥы улууһун бибилэтиэкэтин ситимэ, дириэктэр Лебедева Аэлита Алексеевна; Дьокуускай куорат киин бибилэтиэкэтин ситимэ, дириэктэр Решетникова Нюргуяна Петровна.
Бу үтүө күҥҥэ Нам улууһун кииннэммит библиотекаларын ситимин Көбөкөннөөҕү филиалын библиотекара Февронья Бочкарева “Кыайыы” историческай лотуо оҥорбутунан «Бастыҥ сайыннарар таһаарыы» анал ааты ылла.
Үрдүк кыайыыгынан, ситиһиигинэн Февронья Юрьевнаны эҕэрдэлиибит! Олус сыралаах, үлэлээх, дириҥ ис хоһоонноох үлэни оҥорон өрөспүүбүлүкэ бары муннуктарыгар тарҕанан дьон-сэргэ билиниитин ылла.
“Кыайыы” историческай лотуо хайдах, ханна бастакы хардыыта оҥоһуллубутун сырдаттахха, 2024 сыллаахха Намнааҕы кииннэммит библиотечнай ситим специалистара тус бэйэлэрэ бырайыак көмүскээбиттэрэ. Онно Февронья Юрьевна “Аҕа дойду Улуу сэриитэ” диэн бырайыагын билиһиннэрэн кэпсээбитэ. Остуол оонньуута Аҕа дойду Улуу сэриитин, анал байыаннай дьайыы историятын билиһиннэрэр сыаллаах оҥоһуллубута, 15 хонуулаах, 180 ойуулаах карточкалаах. “Кыайыы” историческай лотуо история чахчыларын оонньуу нөҥүө үөрэтиигэ, билиини хаҥатыыга, Ийэ дойдуга бэриниилээх буолууга, иитиигэ, Аҕа көлүөнэҕэ дириҥ ытыктабылы үөскэтиигэ олоҕурар. Бырайыак үлэҕэ киирэн “Айар” кинигэ кыһата лотуону Улуу Кыайыы 80 сылынан бэчээттииргэ Намнааҕы кииннэммит библиотека ситимин кытта сөбүлэҥ түһэрсибитэ. Салгыы, лото оонньуутун силигин ситэрэргэ Февронья Юрьевна “Айар” кинигэ кыһатын үлэһитэ Саргылана Федоровна Константиновналыын оҥорорго, таҥан таһаарарга үгүс үлэни көрсүбүттэрэ, хас биирдии боппуруостары көрөн-истэн, ырытан, уларытан чочуйан, түмүгэр, «Кыайыы” лотуо 2000 экземплярынан оҥоһуллан тахсыбыта.
Тэрээһиҥҥэ быыстапка тула дьон түмсэн ааптартардартан аавтографтаах кинигэ атыылаһан үөрүү өссө үксээн, дуоһуйан тарҕастыбыт.
«Айар» национальнай кинигэ кыһата былаана киэҥ, далааһыннаах. Төрөөбүт тылбытын сайыннарар, пропагандалыыр национальнай кыһабытыгар өссө да сайда, чэчирии туралларыгар баҕарабыт!
