Автор: Ааһан эрэр 2024 сыл Россия Президенэ В.В.Путин 2023 сыл сэтинньи 23 күнүнээҕи Ыйааҕынан Дьиэ кэргэн сылынан биллэрбитэ, тапталлаах Сахабыт сиригэр Оҕо сыла биллэриллэн үгүс үлэ, элбэх тэрээһиннэр ыытыллыннылар. Бу ыытыллыбыт үлэлэр чэрчилэринэн Н.М.Рыкунов аатынан киин библиотекаҕа ахсынньы 25 күнүгэр Дьиэ кэргэн сылын түмүктүүр сэргэх тэрээһиҥҥэ дьон-сэргэ тоҕуоруһа муһуннулар. Кэлбит ыалдьыттарбытыгар эҕэрдэ тылын тиэртэ Намнааҕы кииннэммит библиотека директора Софронова Майя Романовна.
Дьиэ кэргэн сылыгар библиотекаҕа ханнык сүрүн тэрээһиннэр ыытыллыбыттарын туһунан сырдаттылар ааҕааччыны кытта үлэлиир салаа сэбиэдиссэйэ Григорьева Людмила Савельевна уонна Оҕо библиотекатын сэбиэдиссэйэ Бережнева Варвара Ефремовна. 2024 сылга Нам улууһугар саҥа кинигэлэр тахсыылара үгүс дьиэ кэргэн бэйэлэрин дьоннорун туһунан таһаартарбыт кинигэлэрин библиотека фондатыгар бэлэх уунан кинигэ сүрэхтэниилэрин тэрээһиннэрэ ыытыллыбыттара. Ол курдук Кривошапкиннар дьиэ кэргэн өр сылларга бырааһынан үлэлээбит ийэлэрин, эбэлэрин Алексеева Альбина Георгиевна олоҕун, үлэтин кэпсиир «Сырдыгынан сыдьаайан”, Поповтар дьиэ кэргэн Гражданскай, Аҕа дойдуну көмүскүүр сэрии кыттыылааҕа, холкуоһунай тутуу ветерана, Хатырык нэһилиэгин ытык кырдьаҕаһа Попов Дмитрий Иннокентьевич 125 сааһыгар анаан «Көлүөнэ быстыспат ситимэ», Замятиннар дьиэ кэргэн “Сэбиэскэй кэмҥэ Павлов Семен Петрович II, Замятина Анна Ивановна II” олохторун, үлэлэрин кэпсиир кинигэлэри таһаарбыт дьоммутугар улуустааҕы дьиэ кэргэн уонна ыччат политикатын отделын салайааччыта Евстафьева Екатерина Сергеевна үөрүүлээх быһыыга-майгыга махтал суруктары, сэмэй бэлэхтэри туттарда. Библиотека тэрээһиннэригэр көхтөөхтүк кыттар ааҕааччыларбытыгар Сардаана Юрьевна, Иннокентий Афанасьевич Сидоровтар, Уран Күннэй Саргын Кыыһа дьиэ кэргэҥҥэ, дьиэ кэргэнинэн ааҕар Алена Николаевна, Константин Константинович Шелковниковтарга, Софья Валентиновна дьиэ кэргэнигэр, Евгения Платоновна, Антон Петрович Тойтоновтарга, Вера Прокопьевна Цыпандина-Харыстаанаҕа, библиотека тэрээһиннэригэр көмөлөһөр урбаанньыттарбытыгар: “Урсун” полиграфическай студия салайааччытыгар Кира Аммосоваҕа, “Шведка” маҕаһыын директорыгар Лилиана Дьяконоваҕа, “Фудмания”, “Пронто” кафелар салайааччыларыгар Лена Дмитриеваҕа, Сахаяна Протопоповаҕа Майя Романовна эҕэрдэлээн туран махтал суруктары, бэлэхтэри туттарда. Кэлбит ыалдьыттарга Саҥа дьыллааҕы фотозона, минньигэс астаах фуршет, маастар-кылаастар тэрилиннилэр.
