Нам улууһун хаһыата «Колхоз сирдьитэ» алтынньы 5 күнүгэр 1935 сыллаахха тэриллибитэ. Бастакы редакторынан Холмогоров Иван Гаврильевич ананан үлэлээбитэ. «Колхоз сирдьитэ» хаһыат маҥнайгы нүөмэрэ «Хаһыаппыт соруктара» диэн инники ыстатыйалаах тахсыбыта. Онно «Бэчээт — партия гиэнэ саамай сытыы уонна саамай күүстээх оруудьуйата. Маннык улахан сытыы суолталаах сытыы оруудьуйаны партия биһиэхэ Нам оройуонугар биэрдэ. Бүгүҥҥүттэн ыла таһаарабыт «Колхоз сирдьитэ» хаһыаппытын» диэи этиллибитэ. Хаһыат икки страницанан тахсыбыта, 700 экземплярынан тарҕаммыта.
Сэрии суостаах, ыарахан сылларыгар оройуон нэһилиэнньэтин санаатын көтөҕөр, бэйэни харыстаммат үлэҕэ күүрдэр сүрүн күүһүнэн «Колхоз сирдьитэ» этэ. Икки эрэ страницалаах хаһыат биир нүөмэригэр элбэх матырыйаал бэчээттэнэрэ. Редактор А. Н. Данилов, эппиэттиир секретарь Д. Д. Яковлев, литературной үлэһит А. А. Петухова ыстатыйалары, информациялары уута-хаара суох кылгастык онюроллоро. Хаһыат географията киэҥ этэ, элбэх нэһилиэктэн, колхозтан заметкалар, информациялар бэчээттэнэллэрэ.
1962 сыл сааһыгар ССКП КК Н. С. Хрущев этии киллэриитинэн оройуоннааҕы хаһыаттары таһаарыыны ууратар туһунан уураах ылыммыта. Онон Нам оройуонун «Колхоз сирдьитэ» хаһыата 1962 сыл бэс ыйыгар сабыллыбыта. 1963 сыллаахха Намы уонна Уус-Алданы холбоон Среднеленскэй колхознай — совхознай производственнай управлениены тэрийбиттэрэ. Ол хаһыата «Ленин суола» тахсыбыта. 1965 сылга оройуоннары чөлүгэр түһэриинэн сибээстээн, «Ленин суола» сыыйа Нам оройуонун хаһыата буолбута. Редакторынан А. И. Ксенофонтов бигэргэтиллибитэ.
Араас кэмнэргэ улуус хаһыатыгар биллиилээх суруналыыстар С. С. Овчинников, М. И. Слепцов, В. Л. Еремеев, В. П. Никифорова, А. Д. Васильев, В. В. Сыромятников, И. Е. Сивцев, Т. Т. Халыев уонна да атыттар үлэлээбиттэрэ. 1988 -1995 сс. хаһыаты биллиилээх суруналыыс, поэт, СССР Суруйааччыларын Союһун чилиэнэ Н. М. Рыкунов салайбыта. Олунньу 9 күнүгэр 1985 с. “Ленин суола” хаһыакка “Отуу уота” диэн бастакы хоһоон бэчээттиир рубрика тахсыбыта. Бу рубрикаҕа бастакынан Замятин Т. И. “Эйэ, дьол туһугар” диэн хоһооно уонна Виктор Шапошников “Тутуллуу” диэн сценката бэчээттэммиттэрэ. Нэдиэлэ ахсын олохтоох суруйааччылар хоһоонноро, айымньылара бэчээттэнэр буолбуттара. 1991 с. кэм-кэрдии , политическай уларыйыылар киирэннэр хаһыат аата эмиэ уларыйан «Эҥсиэли» диэн Нам улууһун хочотун аатын иҥэриммитэ.
1995 сылтан өр кэмҥэ кылаабынай редакторынан Касьянов В. Г. үлэлээбитэ. Хаһыат тахсарын тухары мэлдьи күүс-көмө буолан общественнай корреспонденнар үлэлииллэрэ. 2009 с. от ыйын 8 күнүттэн бэйэтэ бас билэр саҥа бэчээттиир оборудования ылынан, хаһыатын редакцияҕа бэйэтигэр бэчээттиир кыахтаммыта. Хаһыат улуус олоҕун сырдатар араас балаһата элбээбитэ, инникилээх хайысханан эдэр ыччат тематиката буолбута.
2021 сылтан хаһыат редакторынан Ноговицына Л. А. үлэлиир. Лена Алексеевна хаһыакка үлэтин 2003 сылтан корреспондент быһыытынан саҕалаабыта.