Автор: 
Ахсынньы 19 күнүгэр РСФСР тыатын хаһаайыстыбатыгар социалистическай күрэхтэһиитин туйгуна, Албан аат III степеннээх уордьан, “За победу над Германией. 1941-1945 гг.”, “За доблестный труд в Великой Отечественной войне 1941-1945гг.» мэтээллэр хаһаайыннара, Саха АССР норуотун хаһаайыстыбатын үтүөлээх үлэһитэ Егор Романович Софроновка анаммыт саҥа бэчээттэнэн тахсыбыт “Норуоттан тахсыбыт салайааччы” диэн кинигэ сэҥээрдэһиитэ буолан ааста. Үөрүүлээх күҥҥэ ыалдьыттаатылар Егор Романович чугас аймахтара, улустааҕы ветеран сэбиэтин председателя Софья Дмитриевна Кобякова уонна Намнааҕы промкомбинатка үлэлээбит биир идэлээхтэрэ. Кэлбит ыалдьыттары СӨ култууратын туйгуна, мелодист Афанасий Татаринов «Аҕам алааһа» ырыатынан эҕэрдэлээн бары да уйадыйан ыллыбыт. Егор Романович Софронов Чурапчы улууһун Хадаар нэһилиэгиттэн төрүттээх опыттаах, үлэтигэр ситиһиилээх салайар үлэһити 1957 сыл Нам оройуонун промышленнай комбинатыгар директорынан аныахтарыттан Намнааҕы промкомбинаты 18 сыл салайан үлэлээбитэ. Егор Романович Нам оройуонугар үлэлиир кэмигэр тэрийэр уонна дьону кытта үлэлэһэр талаана арыллан, үлэ бөҕөнү ыыппыт, уопуттаах, биллэр-көстөр салайааччы буолар. Ол сылларга Намнааҕы Промкомбинат оройуон промышленнай тэрилтэлэрин ортотугар инники күөҥҥэ сылдьар биир бастыҥ үлэлээх коллектив буола үүммүтэ. Саҥа күн сирин көрбүт “Норуоттан тахсыбыт салайааччы” кинигэни хомуйан оҥордо үлэ ветерана, «За вклад в развитие Намского улуса» анал бэлиэ хаһаайката Мария Васильевна Колмогорова. Кинигэ Улуу Кыайыы 80 сылынан кыайыыны уһансыбыт саха сэмэй саллаата Егор Романович Софроновка анаан ахтыылар хомуллан, хаһыакка тахсыбыт статьялар түмүллэн 104 сирэйинэн, 50 ахсааннаах Дьокуускай куорат «Дани-Алмас» кинигэ кыһатыгар бэчээттэнэн таҕыста. “Норуоттан тахсыбыт салайааччы” кинигэ 3 түһүмэхтэн турар: «Кыайыы туруу үлэһитэ» Егор Романович олоҕун, үлэтин-хамнаһын, үчүгэй салайааччы быһыытынан сыаналылларын туһунан ахтыылар киирбиттэр, «Хаһыат саһарбыт страницалара кэпсииллэр» Нам оройуонун «Холкуос илдьитэ» “Ленин суола” “Эҥсиэли” хаһыаттарыгар тахсыбыт ыстатыйалар, интервьюлар киирбиттэр уонна «Удьуор уус дьонтон төрүттээх» Егор Романович аймахтарын ахтыылара. Кинигэҕэ аан тылын Саха Өрөспүүбүлүкэтин сэрии уонна үлэ ветераннарын Сэбиэтин председателэ, СӨ Үтүөлээх юриһа Вильям Очирович Иванов суруйбут. Суруллубут суоруллубат диэн өбүгэлэрбит бэргэн этиилэрэ баар. Егор Романович олорбут олоҕун, үлэлээн ааспыт сылларын сырдатар кинигэ оҕолоругар, сиэннэригэр, чугас дьонноругар, кэлэр кэнчээри ыччакка үтүө холобур, умнуллубат өйдөбүл буолуоҕа. Тэрээһиҥҥэ Якутмебельга үлэлээбит Егор Романович биир идэлээхтэрэ, чугас аймахтар “Водоканал” акционернай общество производственнай-техническэй сулууспатын начальнигын солбуйааччыта Роман Николаевич Осипов, Россия Агропромышленнай комплексын бочуоттаах үлэһитэ, «Гражданскай килбиэн» бэлиэ хаһаайына Галина Николаевна Осипова, улахан сиэн кыыстара Раиса Юрьевна Атласова уо.д.а кыттыыны ыллылар. Егор Романович Софронов Саха сиригэр промышленнай тэрилтэлэр тэриллиилэригэр, сайдыыларыгар киллэрсибит сүҥкэн кылаата, дьоҥҥо-сэргэҕэ көмөтө-өйөбүлэ, эдэр көлүөнэҕэ баай уопутун тириэрдиитэ үйэлэргэ үтүө тылынан ахтылла, чаҕылхай холобур буола туруохтун. Саҥа тахсыбыт кинигэни биһиги библиотекабытыгар кэлэн билсин, ааҕын.
