Автор: Биһиги ааҕар дьиэбитигэр улууспут олохтоохторо бэлэх кинигэ тутуурдаах кэллэхтэринэ улахан үөрүү буолар. Ол курдук, Хатыҥ-Арыы нэһилиэгиттэн РФ үөрэҕириитин бочуоттаах үлэһитэ, СӨ үөрэҕириитин туйгуна, Хатыҥ-Арыы нэһилиэгин бочуоттаах олохтооҕо Васильева Анна Ефимовна быйыл 2025 сылга тахсыбыт икки саҥа кинигэни Н.М.Рыкунов аатынан улуустааҕы библиотекаҕа бэлэх уунна.
Анна Ефимовна биэс сыл устата СӨ Национальнай архыыбыгар үлэлээн, элбэх матырыйаалы хасыһан, ахтыылары хомуйан дьаныардаах үлэтин түмүгэ – “Эверстовтар аҕа уустара” диэн олус баай ис хоһоонноох, сиэдэрэй оҥоһуулаах кинигэни оҥорон бүтэрбит. Кинигэҕэ Куһаҕан Ыал нэһилиэгэр төрөөн-үөскээн, уһаан-тэнийэн XVII-XIX олорбут Эверстовтар аҕа уустарын туһунан сиһилии суруллубут. Өбүгэлэрэ Эверстов Борис Степанович (Барыыс) биэс уолаттарыттан тэнийбит улахан аймах сыдьааннарын туһунан түһүмэхтэринэн араарыллан сырдатыллыбыт, элбэх хаартыскалар киирбиттэр, төрүччүлэрин таблицанан оҥорон көрдөрбүтэ кэрэхсэнэр. Автор “удьуор үтүөтүн умнубакка ыччаттарбытыгар, оҕолорбутугар, сиэннэрбитигэр төрүттэрбит туһунан кэпсии сылдьыаҕын” диэн санаанан салайтаран өр сылларга иитиэхтээн илдьэ сылдьыбыт баҕа санаатын толорон үйэлээх кинигэни оҥорон таһаарбытынан эҕэрдэлиибит уонна махтанабыт!
Кинигэ “Офсет” кыһаҕа 110 экземплярынан бэчээттэнэн тахсыбыт.
Маны таһынан Анна Ефимовна кэргэнэ Моисей Павлович Васильев “Бар дьаҕыл быыраттар аттаах бэс субата бухатыыр” диэн олоҥхото кинигэ буолан 15 эрэ экземплярынан бэчээттэнэн тахсыбытын библиотекаҕа биир кинигэни бэлэхтээтэ. Автор сахалыы хомоҕой тылынан суруллубут олоҥхото эдэр ааҕааччыларбытыгар, олоҥхону үөрэтэр уһуйааччыларга күндү бэлэх буолар. Моисей Павлович талааннаах уруһуйдьут эбит. Кинигэҕэ кини уруһуйдарын уола Максим Васильев ИИ көмөтүнэн тупсаран, киэргэтэн оҥорбута, айымньы ис хоһоонун байытар, арыйар.
Күндү ааҕааччыларбыт! Н.М.Рыкунов аатынан улуустааҕы киин библиотекаҕа Васильевтар дьиэ кэргэн бэлэхтээбит кинигэлэрин кэлэн көрүҥ, сэргээҥ, ааҕыҥ!
Раиса Гоголева, библиограф
