Автор: 
Күлүм чаҕыл күммүн
Мин олус таптыыбын.
Күлүмүрдэс утахтаргынан
Күлүбүрэччи тыгаргын.
Барҕа махтал тыллары
Эйиэхэҕэ аныыбын
Эрэлбин, итэҕэлбин, тапталбын
Эйиэхэҕэ ыытабын… (М.Аргунова)
Олунньу 9 күнүгэр Н. Рыкунов аатынан киин библиотека сырдык саалатыгар үтүө санаа кыымнаах, сылаас-истиҥ ахтылҕаннаах кэрэ күн буолан ааста. Олох силигин ситэрэн, олоҕуҥ маанытык, кэрэхсэбиллээхтик айан-тутан кэлбит эдьиий, дьүөгэ, кэргэн, ийэ, эбээ, хос эбээ, үлэ бэтэрээнэ, Ленскэй нэһилиэк бочуоттаах олохтооҕо, үлэҕэ килбиэнин иһин мэтээл хаһаайкатыгар Мария Михайловна Аргуноваҕа аналлаах «Кэрэ киһи – Цветок Маня, Марийка, Мария Михайловна Аргунова» кинигэ сүрэхтэниитэ буолан ааста.
Истиҥ күҥҥэ ыалдьыттаатылар «Нам улууһа» муниципальнай тэриллии баһылыгын солбуйааччыта Егор Андреевич Протопопов, «Ленскэй нэһилиэк» муниципальнай тэриллии баһылыгын солбуйааччыта Петр Иванович Владимиров, Нам улууһун бэтэрээннэрин Сэбиэтин бэрэссэдээтэлэ Софья Дмитриевна Кобякова, Набережнай түөлбэ салайааччыта Надежда Максимовна Емельянова уонна Мария Михайловна бииргэ үөскээбит үөлээннэхтэрэ, чугас аймахтара, бииргэ төрөөбүттэрэ, оҕолоро, сиэннэрэ. Кэлбит ыалдьыттар киһини долгутар ахтыылары оҥордулар, хоһоонноруттан аахтылар, ырыа да ыллаатылар.
Кэрэ кыыс, чугдаар куолас, мандар тарбах, Далбар хотун, мындыр киһи туһунан үтүө өйдөбүллээх, истиҥ ахтыылардаах сырдык куттаах кинигэ саҥа үүммүт 2025 сылга, 50 ахсаанынан,168 сирэйинэн, Дьокуускай “Дани – Алмас” кинигэ кыһатыгар бэчээттэнэн тахсыбыт. Кинигэни хомуйан оҥорбут дьонунан буолаллар Мария Михайловна төрөппүт кыргыттара Аргунова Парасковья Илларионовна – Бараскыа, Стручкова Анисийа Илларионовна. Кинигэ компьютерга таҥыллыытын, бэчээттэһин үлэтин күтүөтэ Егор Спартакович Стручков оҥорбут. Онтон кинигэ ис тутулугар киирдэххэ – аан тылтан уонна тоҕус балаһаттан турар. Дьиэ-кэргэни сылаас тыынныыр ийэ төрүччүтүттэн, сыдьааннарыттан саҕалаан аймаҕар баар номохтор, үтүөкэн олоҕу олорон ааспыт олоҕун кэпсиир ахтыылар, Мария Михайловна алгыстаах хоһоонноро, кэргэнин, оҕолорун, аймах – билэ дьонун, бииргэ алтыһан үлэлээбит дьонун — сэргэтин ахтыылара уонна элбэҕи кэпсиир хаартыскалар, сыһыарыылар киирбиттэр.Кинигэни түмүктүүр олоҕун аргыһынаан Илларион Иннокентьевичтыын уһун сылларга истиҥник таптаһан, хайҕаһан 51 сыл устата иллээхтик, дьоллоохтук олорбуттарын туоһулуур ыстатыйалар буолаллар. Маннык дириҥ ис хоһоонноох кинигэни, аймах-удьуор дьонноругар, сиэннэргэ, чугас доҕотторугар үйэ-саас тухары хаалар өлбөт-сүппэт өйдөбүнньүк гына бэлэх ууннулар. Бу кинигэҕэ киирбит хас биирдии ахтыы кэнчээри ыччакка үтүө холобур, үйэлээх өйдөбүнньүк буолара саарбаҕа суох.
