Автор: 
Кулун тутар 18 күнэ – Н.М. Рыкунов аатын сүгэр Нам киин модельнай библиотекатыгар сонун, кэрэхсэбиллээх түгэннэр буоллулар. Саха Өрөспүүбүлүкэтигэр Култуура уонна Саха сиригэр Идэлээх сойуус төрүттэммитэ 105 сылларыгар, ону тэҥэ бүтүн Россиятааҕы култуура үлэһиттэрин күнүн бэлиэтиир кэрэ чэрчитинэн, «Кини кимий?» диэн интеллектуальнай оонньуу улуустааҕы профсоюзнай кэмитиэттэр икки ардыларыгар тэрээһиннээхтик ыытылынна. Бу интеллектуальнай оонньуу сүрүн сыалынан Сахабыт сирин култууратын араас хайысхаларыгар сыраларын уурбут, билигин да айымньылаахтык үлэлии сылдьар ытык-мааны култуурабыт деятеллэрин ааттарын-суолларын үйэтитии, кинилэр Сахабыт сирин култуурата сайдыытыгар киллэрбит сыаналаах кылааттарын, үлэлэрин-хамнастарын киэҥ эйгэҕэ тиэрдии буолла. Күрэх кэмигэр Саха сирин аатырдыбыт театр, киинэ артыыстара, хоһоонньут-суруйааччылар, оҥорооччу-режиссердар, уруһуйдьут-художниктар, ырыаһыттар, үҥкүүһүттэр эргэ хаартыскаларынан көрөн таайыы, кинилэр үлэлэрин-хамнастарын, айар куттарын төһө дириҥник билэллэрин тургутан көрүү умсугутуулаахтык ааста. Хас биирдии профсоюзтан түөртүү киһилээх биэс хамаанда күрэхтэһиигэ киирэн, бэйэ-бэйэлэрин кытта күөн көрүстүлэр. Оонньууну толкуйдаан, оҥорон ыытта библиотека үлэһитэ, улуус култууратын үлэһиттэрин идэлээх сойууһун председателэ Александра Парникова. Тэрээһиммит хамаандалар бэйэлэрин билиһиннэриилэриттэн саҕаланна. Кыттыыны ыллылар: Нам улууһун үөрэх управлениетын «Сулустар» хамаандата, улуус дьаһалтатын ааҕар-хонтуруоллуур палататын «Дьулуур», Партизан нэһилиэгин администрациятын «Хомус», Култуура үлэһиттэрин идэлээх сойууһун чилиэннэрин «Веснянки», Олоҥхо дьиэтин үлэһиттэрин «Чыпчаал» хамаандалара. «Кини кимий?» оонньуубут түмүгүнэн 1-кы миэстэни — Култуура үлэһиттэрин идэлээх сойууһун чилиэннэрин «Веснянки» хамаанда ылла. Иккис миэстэҕэ улуус дьаһалтатын ааҕар-хонтуруоллуур палататын «Дьулуур», үһүс бочуоттаах миэстэҕэ Партизан нэһилиэгин администрациятын «Хомус» хамаандалара тахсан кыайыы өрөгөйүн биллилэр. Кыайыылаах хамаандаларга Нам улууһун координационнай сэбиэтин председателэ Васильева Надежда Еремеевна эҕэрдэлээн туран Саха Өрөспүүбүлүкэтин профсоюһун федерацията туруорбут харчынан бириистэрин уонна Добун суруктары туттарда, үөрүү-көтүү аргыстаах оонньуубут түмүктэннэ. Кыттааччылар оонньууну олус сэҥээрэн, дуоһуйа сынньанан, билбэтэхтэрин билэн-көрөн, умнубуттарын өйдөөн-санаан, сэргэхсийэн, күннэтэ үлэ сырата тахсан, өй-санаа чэбдигирэн, үөрэн-көтөн тарҕастылар.
