Автор: Нам улууһун Көбөкөн нэһилиэгин библиотекара Февронья Бочкарева автордаах “Кыайыы” лото остуол оонньуута таҕыста.
“Кыайыы” лото история чахчыларын оонньуу нөҥүө үөрэтиигэ, билиини хаҥатыыга, Ийэ дойдуга бэриниилээх буолууга, иитиигэ, Аҕа көлүөнэҕэ дириҥ ытыктабылы үөскэтиигэ олоҕурар.
“Историческай лото оонньуутун толкуйдаабытым син ыраатта. 2024 сыллаахха Н.М. Рыкунов аатынан Намнааҕы кииннэммит библиотечнай ситим үлэһиттэрэ бары бэйэбит бырайыактарбытын көмүскээбиппит. Онно “Аҕа дойду Улуу сэриитэ” диэн бырайыакпынан кыттаммын билиһиннэрэн кэпсээбитим. Остуол оонньуута Аҕа дойду Улуу сэриитин, анал байыаннай дьайыы историятын билиһиннэрэр сыаллаах оҥоһулунна. Лото 15 хонуулаах, 180 ойуулаах карточкалаах. Оонньуу дьиэ кэргэттэргэ, үөрэнээччилэргэ, ону таһынан, улахан дьоҥҥо ананар. “Кыайыы” лото оонньуута хас биирдии киһи билиитин кэҥэтэригэр, иллэҥ кэмин туһалаахтык атаарарыгар туһуланар.”, – диир автор Февронья Бочкарева.
“Айар” кинигэ кыһата лотону Улуу Кыайыы 80 сылынан бэчээттииргэ Намнааҕы кииннэммит библиотека ситимин кытта сөбүлэҥ түһэрсибитэ. Салгыы, лото оонньуутун силигин ситэрэргэ Февронья Юрьевна “Айар” кинигэ кыһатын үлэһитэ Саргылана Федоровналыын оҥорорго, таҥан таһаарарга үгүс үлэни көрсүбүттэрин автор бэлиэтиир. Ол курдук, кинилэр хас биирдии боппуруостары көрөн-истэн, ырытан, уларытан чочуйбуттара.
Түмүгэр, «Кыайыы” лото муус устар ыйга 2000 экземплярынан оҥоһуллан «Айар” кинигэ маҕаһыыннарыгар 1100 солк. атыыга таҕыста.
Интэриэһинэй, туһалаах остуол оонньуутун атыылаһан дьиэ кэргэҥҥитинээн, доҕотторгутунаан бииргэ оонньооҥ, билиигитин хаҥатыҥ.
