Улууспут хаһыата 1935 сыл алтынньы 5 күнүгэр бастакы нүөмэрэ тахсыаҕыттан, общество өйүн-санаатын олохтоон, чахчыны уонна кырдьыгы бигэргэтэн, төрөөбүт тылбытын, культурабытын харыстаан илдьэ сылдьабыт, сайыннарабыт. Итиэннэ бастакы нүөмэртэн оройуоҥҥа, улууска суруналыыстыка сайдарыгар, суруйааччылар үүнэн-сайдан тахсалларыгар олук ууруллубута.
Нэдиэлэ аайы тахсар хаһыаппыт улууспут күннээҕи олоҕун бэчээккэ тиһэн, бүтүн культурабыт, историябыт кэрэһитэ буолаллар. Онон урукку да өттүгэр билигин даҕаны үрдүк таһымнаах, эппиэтинэстээх уонна дьон-сэргэ, улууспут дьылҕатыгар быһаччы оруоллаах эйгэнэн буолабыт.
Бүгүн биһиги үлэбитин-хамнаспытын аныгы технологиялары кытта дьүөрэлээн, бу дьыаланы эрэллээхтик салгыыбыт. Биһиги таһаарыыларбыт аныгы сыыппара кэмин кытта тэҥҥэ сайдаллар. Кэнники биэс сылга төрөөбүт төрүт тылбытынан тахсар Энсиэли.рф сайтанныбыт, телеграмҥа ханаал, Вконтакте, Одноклассники социальнай ситимнэргэ страницалар баар буоллулар. Бу сетевой уонна социальнай ситимнэрбитигэр күн аайы, өрөбүлү, бырааһынньыгы аахсыбакка, быспакка сонуннары, иһитиннэриилэри тиһэ олоробут. Маныаха биһиэхэ улахан көмөлөһөөччүлэрбит общественнай корреспонденнарбыт буолаллар. Улуус хас биирдии нэһилиэгэр суруйар кыдьыктаах дьон баалларыттан олус үөрэбит. Кинилэр баар буоланнар биһиги хаһыаппыт, таһаарыыларбыт үлэтэ ис хоһооно кэҥиир, суолтата үрдүүр.
Бу бэлиэ 90 сылбытынан редакция ветераннарын, Нам суруналыыстарын, общественнай корреспонденнары, коллективпын идэҕитигэр бэриниигит, дьон туһугар ахсаабат кыһамньыгыт иһин махтанабын! Эһиэхэ уонна чугас дьоҥҥутугар чэгиэн доруобуйаны, өрө көтөҕүллүүнү, саҥа бырайыактары, эйэни, дьолу уонна этэҥҥэ буолууну баҕарабын!
Официальный сайт намской межпоселенческой централизованной библиотечной системы