Автор: Муус устар ый 17 күнүгэр биир дойдулаахпыт, Саха Өрөспүүбүлүкэтин суруйааччыларын Сойууһун чилиэнэ, бэйиэт, Бартыһаан нэһилиэгин “Ытык киһитэ”, Нам улууһун культуратын бочуоттаах үлэһитэ, айылҕаттан айдарыылаах Анна Парникова – Сабарай Илгэ үтүө аата Бартыһаан нэһилиэгин олохтоох модельнай библиотекатыгар иҥэрэр дьоро күҥҥэ аймах-билэ дьонноро, биир дойдулаахтара, «Отуу уота» литературнай түмсүү чилиэннэрэ, Намнааҕы киин библиотека коллектива муһуннулар.
Библиотека таһыгар Анна Парниковаҕа анаммыт мемориальнай дуосканы арыйыы сиэрэ-туома ыытылынна.
Салгыы тэрээһин үөрүүлээх чааһыгар эҕэрдэ тылы эттилэр: “Бартыһаан нэһилиэгэ” МТ баһылыга Алексей Николаевич Зырянов, “Нам улууһа” МТ Баһылыгын солбуйааччыта Егор Андреевич Протопопов, Нам улууһун культураҕа уонна духуобунай сайдыыга салалтатын начальнигын солбуйааччы Александра Николаевна Новгородова, Нам улууһун библиотекаларын тиһигин директорын солбуйааччы Александра Валентиновна Никонова.
Поэт бииргэ төрөөбүт балта Антонина Алексеевна Харитонова хаан-уруу аймахтарын аатыттан Анна Парникова – Сабарай Илгэҕэ анаммыт стендэни кэлбит ыалдьыттарга сиһилии кэпсээтэ, билиһиннэрдэ.
Үтүө тыллары бу күҥҥэ анаатылар Сабарай Илгэ поэзиятын сүгүрүйээччилэрэ, олохтоох автордарбыт, Алексей Татаринов-Удьурҕай, Григорий Эверстов-Тыыппалаах, Прасковья Байанаева, Александр Прибылых, Мария Мохначевская — Марта-Мария уо.д.а.
Сабарай Илгэ туһунан истиҥник санаан ахтан аастылар бииргэ төрөөбүттэрэ Альбина Алексеева, Николай Парников, тастыҥ балта Юрчана Парникова.
Бу тэрээһини иилээн-саҕалаан ыыппыт Партизан нэһилиэгин «Хомус» фольклор дьиэтин коллектива (директор Семен Алексеев) Сабарай Илгэ хоһооннорун уустаан-ураннаан аахтылар, ырыатын ыллаатылар.
Намнааҕы кииннэммит библиотека ситимин коллективын аатыттан Партизан нэһилиэгин администрациятыгар, «Хомус» фольклор дьиэтин коллективыгар, Сабарай Илгэ аймахтарыгар махтал истиҥ тылын тиэрдэбит.
Анна Парникова – Сабарай Илгэ суруйан хаалларбыт бастыҥ айымньылара, хомоҕой хоһоонноро сурукка-бичиккэ хааланнар ааҕылла туруохтара диэн эрэнэбит!
