Автор: Олунньу 13 күнэ — төрөөбүт төрүт тыл, сурук-бичик күнэ.
Кыттааччы санаата:
Петухова Маргарита Романовна.бу курдук үллэстэр: “Маннык хабааннаах тэрээһиҥҥэ бастакы кыттыым. Саха тылын 60-ча сыл анараа өттүгэр оскуолаҕа үөрэтэр этибит, нэдиэлэҕэ биир эрэ уруок буолара. Ол кэннэ сахалыы сурук суруйбатах кэриэтэбин. Сахалыы дьыктааҥҥа кэлэммин сахалыы буукубаларбын сөргүттүм. Маннык тэрээһин ыытыллара нэһилиэнньэҕэ хайаан да наадалаах уонна суолталаах”
Олунньу 13 күнэ — сахаларга олус суолталаах күн буолар. Хас биирдии омук кэскилэ төрөөбүт тылыгар сытар, Ийэ тылбыт инники олохтооҕо, үйэлээҕэ — бу билигин олорор дьон төһө билэриттэн, үөрэтэриттэн, харыстыырыттан, саҥарарыттан, ааҕарыттан тутулуктаах.
Төрөөбүт төрүт тылбытын сайыннарыыга, үрдэтиигэ биир сүрүн хамсааһыны оҥорор сылын аайы ыытыллар Саха дьыктаана буолар.
Олунньу 14-15 күннэригэр улуус библиотекалара нэһилиэнньэни түмэн Өрөспүүбүлүкэтээҕи Саха дьыктаан аахсыйаҕа үгэс быһыытынан кытыннылар. Бу сыл дьыктаана — Улуу Кыайыы 80 – сылын көрсө, Саха сиригэр Ийэ дойдуну, Россияҕа Аҕа дойдуну көмүскээччилэр сылларыгар ананна. Дьыктаан тиэкиһэ саха фронтовик суруйааччыта Тимофей Сметанин «Кыайбыттар ыһыахтара» айымньытыттан быһа тардыы буолла.
Николай Рыкунов аатынан киин модельнай библиотекаҕа бу күн 22 киһи суруйан бэйэлэрин билиилэрин, таба суруйууларын тургутан көрдүлэр. Өрүүтүн курдук хас сыл аайы дьыктааҥҥа сылдьар дьоннорбутун хайгыы-астына көрөбүт. Тиэкиһи библиотекарь, саха тылын үөрэхтээҕэ, Ийэ тылыгар ис сүрэҕиттэн ыалдьар, болҕомтотун уурар Мария Петрова аахта.
Хас биирдии библиотекаҕа бу күннэргэ араас ис хоһоонноох тэрээһиннэр буолан аастылар, ол курдук Саха тылын туһунан тургутуктар, интеллектуальнай оонньуулар, кэпсэтиилэр, онтон да атыттар.
Уопсайа 17 нэһилиэктэн 249 киһи кыттыыны ылла, 40 «Бастыҥтан бастыҥ суруксут», «Бастыҥ суруксут» көрдөрүүнү биэрдилэр.
Нам киин бибилэтиэкэтигэр кыттыбыт дьонтон “Бастыҥтан бастыҥ суруксут” анал ааты ылла Никонова Светлана, «Бастыҥ суруксут» анал ааты ыллылар Кириллина Анна, Копырина Надежда, “Үчүгэй суруксут” анал ааты Гладкова Любовь, Новгородова Александра, Трофимова Анисия, Сайдам Айар Кыыдаана Арылхан кыыһа ыллылар.
Ордук көхтөөхтүк 1Хомустаах, Хатырык, Үөдэй, Хатыҥ-Арыы, Нам нэһилиэктэрин дьоно-сэргэтэ кытынна. Акцияҕа кыттыбыт дьон бары туоһу сурук туттулар, кыайыылаахтар “Бастыҥтан бастыҥ суруксут”, “Бастыҥ суруксут”, «Үчүгэй суруксут» хайҕабыл добун суругунан бэлиэтэниэхтэрэ.
Маны таһынан «Таптыыр Сахам тылынан» Өрөспүүбүлүкэ оскуолаларын 3-8 кылаас үөрэнээччилэригэр сахалыы дьыктаан аахсыйаҕа Нам улууһуттан 1413 үөрэнээччи кыттыыны ылла. Намнааҕы Оҕо библиотекатын тэрийиитинэн улуус киинигэр 1010 үөрэнээччи кытынна (сэбиэдиссэй Бережнева В.Е.). Үөрэнээччилэр саха тылын таба суруйууга тургутук ыйытыктарга эппиэтээтилэр.
Бары кыттыбыт дьоҥҥо махтанабыт, Ийэ тылбыт бүгүҥҥүтэ, сарсыҥҥылаах буолан үүнэ-чэчирии турдун! Норуот күүһэ – өйүгэр, өйүн күүһэ — тылыгар буоларын умнумуоҕуҥ!
Наталья Павлова, информационнай-методическай салаа сэбиэдиссэйэ.
