Автор: Бүгүн, олунньу 27 күнүгэр Н.М.Рыкунов аатынан Намнааҕы киин модельнай библиотека уонна Нам улууһун Дьиэ кэргэн уонна ыччат политикатын отделын үлэһиттэрэ Төрөөбүт тыл, сурук-бичик ыйын чэрчитинэн, биллиилээх государственнай уонна политическай деятель Винокуров И.Е. төрөөбүтэ 130 сылыгар аналлаах Нам улууһун эдэр ыччаттарын икки ардыларыгар «ТААЙ-БИЛ» интеллектуальнай оонньуу олус сэргэхтик, интириэһинэйдик ыытылынна. Оонньууга кытта 6 хамаанда муһунна: Хатырык, Көбөкөн, Бөтүҥ, Хатын-Арыы нэһилиэктэриттэн уонна И.Е.Винокуров аатын сүгэр Намнааҕы педагогическай колледж устудьуоннарын икки хамаандата.
Тэрээһин саҕаланыытыгар оҕолорго И.Е. Винокуров олоҕун, үлэтин сырдатар библиотека үлэһиттэрэ оҥорбут «Во имя жизни народа» анимационнай киинэни көрдөрөн, ону сэргэ, библиотека сайтыгар «Наследие Винокурова» электроннай ресурсу сиһилии кэпсээн билиһиннэрдибит. Ол кэннэ, хамаандалар «Уһулуччулаах биир дойдулаахпыт И.Е.Винокуров» интеллектуальнай оонньууга күөн көрүстүлэр.
Оонньуу түмүгүнэн 1 миэстэни – Хатырык эдэр ыччаттара, 2 миэстэҕэ – Көбөкөн ыччаттара, 3 миэстэҕэ – Хатыҥ-Арыы ыччаттарын хамаандалара таҕыстылар. Кыайыылаахтарга Добун суруктары, сыаналаах бэлэхтэри, бары кыттааччылар Туоһу суруктары, минньигэс бириистэри туттулар. Бу тэрээһинтэн эдэр ыччаттарбыт биир дойдулаахпыт И.Е. Винокуров олоҕун, үлэтин туһунан үгүһү билэн тэрийээччилэргэ махтанан тарҕастылар.
