Автор: Үтүө үгэс быһыытынан, сэтинньи 25-с ахсынньы 5-с күннэригэр Өрөспүүбүлүкэбитигэр Олоңхо Декадата ыытыллар. Олоҥхо декадатын чэрчитинэн улууспутугар араас хабааннаах тэрээһиннэр ыытылыннылар. Н.М.Рыкунов аатынан улуустааҕы киин модельнай библиотека ахсынньы 5 күнүгэр Олоҥхо декадытын түмүктүүр тэрээһини «Оһуордаах олоҥхо суолунан» диэн улахан кылаас оҕолоругар хамаанданан күөн-күрэс ыытта. Тэрээһин үөрүүлээх аһыллыытыгар сэтинньи 25 күнүгэр ыытыллыбыт «Олоҥхо дьыктаан» Бастыҥ суруксуттарыгар ааҕааччыны кытта үлэлиир салаа сэбиэдиссэйэ Наталья Федоровна Добун суруктары туттартаата, кырачаан ырыаһыт ыалдьыппыт Элла Егорова норуот ырыатынан эҕэрдэтин тиэртэ.
«Оһуордаах олоҥхо суолунан» хамаанданан күөн-күрэскэ Олоҥхо тиэмэтигэр бэйэлэрин билиилэрин тургутан көрөөрү, билбэттэрин билэн бараары улууспут 4 оскуолатын хамаандата кыттынна: Иван Семенович Гаврильев аатынан Нам 1-кы нүөмэрдээх орто оскуолата, Нам 2-с нүөмэрдээх орто оскуолата, Николай Семенович Охлопков аатынан улуустааҕы гимназия, Хамаҕаттаатааҕы Саха –француз лицей үөрэнээччилэрэ. «Оһуордаах олоҥхо суолунан» хамаанданан күөн-күрэспит 5 түһүмэҕинэн буолла, ол курдук, I түһүмэх: «Олоҥхо тыла өһө» — бэриллибит тыллары тылдьыттан булан быһаарыы, этии толкуйдааһына. Бу түһүмэххэ оҕолор олоҥхо тиэкиһиттэн бэлэмнэммит тыллар суолталарын Саха тылын быһаарыылаах тылдьытыттан булан, ааҕан тыл суолтатын өйдөөн, ол тылы туттан бэйэлэрэ этиилэри толкуйдаатылар.
II түһүмэх: «Олоҥхону 3 тылынан ааҕыы» — сахалыы, нууччалыы, английскайдыы дорҕоонноохтук, иэйиилээхтик ааҕыы.
III түһүмэх: «Олоҥхо ойуутун пазлга таҥыы» — бириэмэҕэ оҥорон таһаарыы. Библиотекабыт үлэһитэ Эльвира Валентиновна маһынан олоҥхо ойуутунан пазл оҥорон аҕалан оҕолор, учууталлар олус сэҥээрэн бу түһүмэхпит олус интириэһинэйдик ааста.
IV түһүмэх: «Нам улууһун олоҥхоһуттарын төһө билэҕин?» Оҕолорбут Нам улууһун олоҥхоһуттарын билэллэриттэн олуһун үөрэ, хайҕыы иһиттибит.
V түһүмэх: «Өбүгэ оонньуута» — хамандыырдар күрэхтэрэ. Саҥа тахсыбыт «Холкутуйуу» оонньууга хамандыырдар күөн көрүстүлэр. Оонньууну бары да тэрээһин кыттыылаахтара сэргээн-сэҥээрэн, тэрээһин кэнниттэн учууталлар оонньоон көрөн дуоһуйууну ыллылар. Күөн-күрэспит түмүгүнэн 1 үрдэлгэ — Хамаҕаттаатааҕы Саха –француз лицейын хамаандата, 2 үрдэлгэ — Иван Семенович Гаврильев аатынан Нам бастакы нүөмэрдээх орто скуолата, 3 үрдэлгэ тэҥ бааллаах — Нам 2-с нүөмэрдээх орто оскуолата уонна Николай Семенович Охлопков аатынан улуустааҕы гимназия хамаандата таҕыста. Бары кыайыылаахтарга Добун суруктар, минньигэс бириистэр туттарылыннылар. Тэрээһиҥҥэ кэлбит оҕолорбут биһиги Наммыт улууһугар ааспыт үйэлэр усталарыгар 46 олоҥхоһут олорон ааспытын, Олоҥхо бу биһиги сахалар бүттүүн киэн туттуубут, духуобунай баайбыт буоларынан өссө төгүл чиҥэтэн өйдөөн, инникитин да олоҥхону ааҕыахпыт, үөрэтиэхпит диэн тарҕастылар.
