ТАБ. МӨЛӨКҮҮРЭП Ы.ДБ. УҤУОҔАР ХОҺООН ДЬӨРБӨТӨ
1. КИҺИ КИҺИТЭ - МӨЛӨКҮҮРЭП ЫЛДЬАА ДЬӨГҮӨРЭБИС
Киһини кии гынар былаас
Киһилии киһитэ буолан,
Мөлөкүүрэп Ылдьаа дуолан
Мөссүөнэ амарах-сылаас.
Тулаайах уол оҕо, дьылҕа
Тургутар үөрэҕин ааһан,
Туруу үлэһитин ааһан,
Туйгун киһи дэппит, дьолго.
Дьэ, уонна киһи киһитэ,
Дьиҥнээх табаарыс буолаары,
Үйэтин-сааһын тухары
Үрдүүр үлүскэннэммит ээ.
Тыыннаах дууһаны суут-сокуон
Тыйыс хараҕынан кыныыр
Суо Былааска сулууспалыыр —
Суобастаах киһиэхэ молуон.
Уураахтаах кумааҕы курдат
Урааҥхайдар хара тыыммыт
Быстарын көрөн, быыһаабыт
Бас-көс уолбут умнуллубат.
Хойуора уолбут харахтаах
Хоргуйбут дьоҥҥо бурдугу,
Балыгы уунан, олоҕу
Барҕаппыта - аар махталлаах.
Өрүһүйбүт сордоохторун
Өлгөм үүнэр ыччаттара
Күндү аатын ааттыахтара
Күөн туттаннар куруутун.
Үс сахабыт үрүҥ тыынын —
Үс бастыҥ суруйааччытын
Айымньытын харааҥнаһан,
Атааннаммыта былаастан.
Киһилии чиэс диэннээх киһи
Киһийдэхтэргэ да киирэн,
Кэхтибэтэҕэ кэннинэн,
Кэрдиллиэ да буоллар, кини!
Киһини кытта Кырдьыгы
Килбиэннээхтик өрө туппут
Өргөс-кылаан тумулукпут
Өрүү ахтылла сылдьыаҕа.
2. САХА АЛМААҺА
Салалта дьапталҕатыгар
Алмаастааҕар аҕыйахтар
Аламай санаалаах дьоннор,
Айыы дьайыылаах тойоттор.
Омуоһап Махсыымы кытта
Мөлөкүүрэп Ылдьаа аата
Алмаас тэҥҥэ дьэрэлийэр
Былаас нэс түөттүгэнигэр.
Чаҕылхай Махсыымныы кини
Аҕыс кырыыланыар диэри
Айылгытын арылыта
Олоххо чочуламмыта.
Сынтарыйбат өргөс-кылаан,
Өркөн-чаҕаан санааланан,
Сахаҕа Нам уолаттара
Баар-суох куйах буолбуттара.
Омуоһап омукпут кутун
Дурдалаабыт оҥку суолун
Мөлөкүүрэп тутуспута,
Тыыммыт иһин туруммута.
Унньуктаах уһуннук киирсэн,
Ньоҕой сахатын киллэрэн,
Абааһылыы былаас сиэрдээх,
Айыы дьаһалын ситиспиттээх.
Аччыктаан имири эстэр
Алдьархайтан мүлчүрүйэр
Дьолбутугар төрөөбүт эр
Соҕотохпут - Мөлөкүүрэп.
Кини - саха чиҥ алмааһа:
Саас-үйэ тухары ааһа
Күндүтүк сыаналаныаҕа,
Көҕүтэр сыдьаайданыаҕа!
3. УБАЙБЫТ
Убайа суох киһи убай,
Холобур оҥостуох этим
Үтүө-мааны дьонтон арай
Мөлөкүүрэп Ылдьааны мин.
Кини эрэйдээх-буруйдаах
Эр соҕотохтуу олоҕун
Атын, чалбараүҥ уйгулаах
Дьылҕалартан ордоруоҕум.
Сыччах Ылдьаа салалтаттан
Харыстаамына барыыра
Этин-тириитин, аас сахтан
Кэскилбитин быһаахтаары.
Боотур курдук соҕотоҕун
Орто дойдутун иннигэр
Охсуспута кини модун,
Суостаах тутуллуун элик эр.
Булгуруйбат санаа өргөс
Кылаанынан анньан-анньан,
Буоратар туора хатаан-өс
Буомун туораппыта кыайан.
Эстибиттэн - тиһэх күүһүн,
Ааспыттан — бүтэһик аһын
Былдьыыр дьаһалта өһүөнүн
Өһүлбүтэ Ылдьаа, ыһан...
Аччыгы аһаппыт айыы,
Тоҥмуту ириэрбит истиҥ,
Үтүөкэн убайбытыныы
Мөлөкүүрэп кэриэстэннин!
4. КЭРИЭС
Өлөр ыарыыга ылларбыт
Мөлөкүүрэп кэс санаатын
Бөлүөнүмҥэ этэн хаалбыт,
Мөрөйдөннүн да, хайаатын.
Ытык өйдөбүллэрбитин –
Ымыы өйөбүллэрбитин
Сиргэ-буорга тэбистэрбэт
Биир бигэ соруктаах эбит.
Өксөкүлээх, Ньосторуойап,
Алампа - саха үс кутун
Тэҥэ үс тутаах дьоммутун
Көмүскэбит, уорастыйа.
Кутун-сүрүн тоһуталаан
Норуоту кулут гынаары,
Тойот бэл бокуонньуктары
Соһуолаһарын утаран:
«Устар бириэмэни сэргэ
Устуоруйа бу мөккүөргэ
ким таппытын, ким сыыспытын
Сыаналыа», - диэбит сыҕарым.
Ол эбэтэр биһиэхэҕэ
Ээр-сэмээр итэҕэйдэҕэ
Судьуйа сүдү солотун,
Дьоһун иэс сүллэр солуутун.
Бэрт эрэ киһи бэдэрэ
Бэйэтинээҕэр ордуоҕун
Биир-биэс тыла суох эрэнэ,
Биэриэ сиппэтэх соругун...
Дыгыннааҕар мындыр дархан
Баһылык сырдык аатыгар
Сахалыы кут-сүр, тыл тууспан
Уотун оттуох, алаатыгар!
Автор: 
