Автор: Ахсынньы 10 күнүгэр Н.М.Рыкунов аатынан киин библиотекаҕа Намнааҕы 5040 нүөмэрдээх сбербааҥҥа өр сылларга управляющайынан үтүө суобастаахтык үлэлээбит, киэн туттар киһибит, Николай Николаевич Лукинов төрөөбүтэ 100 сылын туолбут, кини сырдык кэриэһигэр ананан “Маленькая история большого банка от сберкассы до сбербанка» диэн саха сиригэр маҥнайгынан тахсыбыт дьоһун үйэлээх кинигэ сүрэхтиитэ ыытылынна. Кинигэ 55 ахсаанынан, 222 сирэйинэн быйыл 2024 сылга «Дани-Алмас» кинигэ кыһатыгар бэчээттэнэн тахсыбыт. Кинигэни хомуйан бэчээттэппит өр сылларга сбербааҥҥа үлэлээбит Татьяна Гаврильевна Уваровская. Ааҕааччы саҥа тахсыбыт кинигэттэн билсиэ Нам оройуонугар сбербаан тэриллибит историятын, сайдыытын, сбербааҥҥа үлэлээбит-хамсаабыт үтүө дьоһун-мааны дьонун-сэргэтин, салайааччыларын, сбербаан үлэһит династияларын. Дьоро күҥҥэ кыттыыны ыллылар “Нам улууһа” муниципальнай тэриллии экономическай сайдыы управлениетын начальнигын солбуйааччыта Егорова Анна Иннокентьевна, “Ленскэй нэһилиэк” муниципальнай тэриллии баһылыгын солбуйааччыта Тимофей Егорович Охлопков, сбербаан тэрилтэҕэ үлэлээбит ветераннар, үлэһиттэр уонна Николай Николаевич аймах-билэ дьоно. Кэлбит ыалдьыттар саҥа тахсыбыт кинигэ туһунан санааларын үллэһиннилэр, эҕэрдэ тылларын тиэртилэр. Ырыа кэһиилээх «Сарыада» фольклорнай бөлөҕө толорууларын, (сал. Мария Григорьева), Афанасий Татаринов баяҥҥа доҕуһуоллаан ыллаабытын ыалдьыттар сэҥээрэ иһиттилэр.
Сыл-хонук ааһан иһэр… Сбербаан тэрилтэтигэр элбэх үтүө-мааны дьоммут үлэлээн, бэйэлэрин суолларын-иистэрин хаалларан аастылар. Кинилэр олорон ааспыт олохторо, үтүмэн үлэлэрэ үйэ-саас тухары кинигэҕэ киирдэҕэ.
