Автор: Кулун тутар 14 күнүгэр Н.М. Рыкунов аатынан киин библиотека кыраайы үөрэтэр саалатыгар “Свет Кулаковского – Өксөкүлээх Сардаҥата” диэн акция саҕаланна. Итиэннэ кини оҥорбут сүҥкэн кылаатыгар сүгүрүйэн киниэхэ анаммыт кинигэ быыстапката турда. Бу акция Алексей Елисеевич республикаҕа былырыыҥҥыттан кини төрөөбүт күнүгэр – кулун тутар 16 күнүгэр ананан ыытыллар.
Акцияҕа Намнааҕы профессиональнай лицей устудьуоннара кыттыыны ыллылар. Кинилэргэ библиотека үлэһиттэрэ Р.Н. Дьяконова, М.И. Петрова Өксөкүлээх Өлөксөй олоҕуттан, айымньылаах үлэтиттэн иһитиннэриилэри оҥордулар. Ол курдук, саха омук духуобунай лидера — Өксөкүлээх Өлөксөй бастакы айымньытын, «Байанай алгыһын» 1900 с. суруйбутун уонна ити сыл саха суругунан литературатын төрүттэммит сылынан ааҕылларын тоһоҕолоон бэлиэтээтилэр. Бу айымньы быйыл суруллубута 125 сылын туолар үбүлүөйдээх сыла буоларын сиһилии сырдаттылар. Түмүккэ кэлбит устудьуоннар «Байанай алгыһа» хоһоонунан айымньыны ааҕар чиэскэ тигистилэр.
Мария Иннокентьевна ПЕТРОВА
