Автор: Кулун тутар 31 күнүгэр, улуус дьаһалтатын аактабай саалатыгар улууспут тумус туттар киһитэ, СР норуотун хаһаайыстыбатын үтүөлээх үлэһитэ, СР муниципальнай сулууспатын туйгуна, СР айылҕа харыстабылын туйгуна, «Гражданскай килбиэн» бэлиэ хаһаайына, СР Ытык сүбэтин, Нам улууһун уонна Түбэ нэһилиэгин Бочуоттаах олохтооҕо Розалия Егоровна Лукина төрөөбүтэ 80 сааһынан чиэстиир тэрээһин үрдүк таһымҥа ыытылынна.
Бу күн бастакы аҥарыгар Н.М. Рыкунов аатынан киин библиотека конференц-саалатыгар «Түөлбэбэр анаммыт олоҕум…» быыстапка арыллан элбэх киһи сэҥээриитин ылла. Бу тэрээһиҥҥэ инники кэскилбит – ыччаппыт сылдьан элбэҕи биллэ-көрдө, тумус туттар киһибит олоҕун-дьаһаҕын, үлэтин-хамнаһын туһунан сиһилии билистилэр.
Розалия Егоровна иитээччи идэтин баһылаан төрөөбүт-үөскээбит түөлбэтигэр – Түбэ нэһилиэгэр иитээччинэн, сэбиэдиссэйинэн, норуот депутаттарын Сэбиэтин депутатынан, сельсэбиэт председателинэн, Түбэ нэһилиэгин дьаһалтатын баһылыгынан олус таһаарыылаахтык уонна ситиһиилээхтик үлэлээбитэ.
Ханна да үлэлээтэр материальнай-техническэй хааччыллыыга улахан болҕомтотун уурара. Баһылыктаан олорор кэмнэригэр пекарня, спортивнай саала, телефон ситимэ, чааһынай дьиэлэр тутуллубуттара. Нэһилиэнньэтин олоҕун тупсарыгар сыралаһан үлэлиирэ, билигин даҕаны бочуоттаах наставник быһыытынан сүбэ-ама, күүс-көмө буола олорор.
Үөрүүлээх тэрээһиҥҥэ улуус баһылыга Юрий Слепцов, ССРС культуратын туйгуна, СР норуотун хаһаайыстыбатын үтүөлээх үлэһитэ, «Гражданскай килбиэн» бэлиэ хаһаайына, Нам улууһун Ытык киһитэ Мария Габышева, Нам улууһун баһылыгынан 1995-2000 сс. үлэлээбит Александр Ядреев, СР тыатын хаһаайыстыбатын үтүөлээх үлэһитэ, Нам улууһун бочуоттаах олохтооҕо Андрей Бочкарев, СР бааһынай хаһаайыстыбаларын ассоциациятын толорооччу директора, СР тыатын хаһаайыстыбатын туйгуна Зарема Бочкарева, Түбэ нэһилиэгин баһылыга Григорий Гуляев, республикаҕа маҥнайгы «Үтүө дьыала» хамсааһын дирекциятын директора Иннокентий Бочкарев, Галина Кривошапко аатынан государственнай филармония солиһа Петр Попов, нэһилиэктэр баһылыктара истиҥник эҕэрдэлээн, Розалия Егоровна үлэлээн-хамнаан ааспыт сылларын олус истиҥник санаан-ахтан аастылар.
Розалия Егоровна айымньылаах үлэтинэн-хамнаһынан, чаҕылхай олоҕунан барыбытыгар үтүө холобур буолар. Кини ыллыктаах санаата, сайдыыга өтө көрүүтэ, сатабыллаах салайааччы быһыытынан нэһилиэгин, улууһун сайдыытыгар тирэхтээх акылаат уурбута, сүҥкэн кылаатын киллэрбитэ.
Убаастабыллаах Розалия Егоровна! Эйиэхэ баҕарабыт чиргэл тиит курдук кытаанах доруобуйаны, оҕолоруҥ, сиэннэриҥ, хос сиэннэриҥ тапталларынан угуттанан, ситиһиилэринэн кынаттанан уһун үйэлэн, дьоллоох буол!
«Нам улууһа» МО пресс-сулууспата
