Автор: Ахсынньы 17 күнүгэр Түбэ библиотеката аһыллыбыта 70 сыллаах үбүлүөйэ буолла. Манна өр сылларга үлэлээбит библиотекарьдар, техүлэһиттэр, улуус библиотекатыттан, тыа библиотекаларыттан, олохтоохтор мустан сэргэх тэрээһин буолан ааста. Тэрээһин тойук ырыатынан сиэдэрэйдик саҕаламмыта. Онтон кинигэ тутуурдаах кыыстаах уол үҥкүүтүн кэрэхсии дуоһуйа көрдүбүт. Кырачаан уһуйан оҕолоро кинигэ туһунан хоһоон ааҕан сэргэхситтилэр.
Библиотека 70 сыллаах суолун кэпсиир видео-ролик көрдөрүллүбүтэ, ону таһынан араас сылларга үлэлээбит дьон ахтыыларынан анал брошюра бэчээттэнэн тахсыбыт.
Намнааҕы киин библиотека директора Майя Романовна, нэһилиэк дьаһалтата уонна кэлбит ыалдьыттар итии-истиҥ эҕэрдэ тылларын этэн, үлэһиттэргэ наҕараадалары үөрүүлээх быһыыга-майгыга туттарбыттара. Библиотека бары үлэһиттэрэ тахсаннар эҕэрдэ тыл этэн, бэлэх уунан истиҥ тыыннаах тэрээһини түмүктээтилэр.
Полина Алексеевна библиотека үбүлүөйүн чэрчитинэн «Кинигэ» туһунан улуустааҕы күрэх ыыппыта. Бу күн кыайыылаахтары ааттаталаата, Добун суругунан уонна хоһооннору тиһэн хомуурунньук оҥорбутунан бэлэх уунна.
Үөрүүлээх чааһын кэнниттэн ыалдьыттары барыларын толору минньигэс астаах сандалы остуолларыгар ыҥырдылар.
Түбэ нэһилиэгин олохтоохторо, бары тэрилтэлэр түмсүүлээхтик библиотекала үөрүүлээх тэрээһинин үрдүк таһымҥа тэрийсибиттэр!
Түбэ библиотекатын коллективыгар уонна ааҕааччыларыгар бу бэлиэ түгэнинэн истиҥ эҕэрдэ тиэрдэбит! Ааҕар дьиэ алаһата куруук дьонунан туола турдун, билии-көрүү кыһата буолан өссө да чэчирии сайыннын!
Варвара Носкова, Хатыҥ-Арыы нэһилиэгин библиотекатын сэбиэдиссэйэ
