Автор: Тохсунньу 29 күнүгэр М.К.Аммосов аатынан Хатырык орто оскуолатыгар “Барҕарыы” научнай-практическай конференция ыытылынна. Конференция сыала –соруга: чинчийэр үлэ нөҥүө оҕо айар, ырытар, анаарар дьоҕурун, сахалыы саҥарар-толкуйдуур сатабылын сайыннарыы.
Уопсайа улуус оскуолаларыттан 127 үөрэнээччи 8 хайысханан чинчийэр үлэлэринэн кытыннылар. Быйылгы конференцияҕа Нам киин библиотекатын этиитин өйөөн, үөрэх управленията “Төрүччүнү үөрэтии” сиэксийэтин тэрийдэ. Сиэксийэҕэ 11 оҕо Нам оскуолаларыттан, 1 Хомустаахтан, Көбөкөнтөн, Арбынтан, Аппааныттан, Хамаҕаттаттан, Модуттан көхтөөх кыттыыны ыллылар.
Дьүүллүүр сүбэҕэ “Хотугу омуктар төрүччүлэрин үөрэтэр-чинчийэр научнай институт” общественнай тэрилтэ правлениятын чилиэнэ, краевед Христофоров Афанасий Христофорович, М.К.Аммосов аатынан Государственность историятын түмэлин научнай сотруднига Станислав Дьяконов, Н.М.Рыкунов аатынан Нам киин библиотекатын библиографа Раиса Гоголева үлэлээтилэр.
Дьүүллүүр сүбэ кыттыбыт оҕолор төрүччүлэрин дириҥник үөрэтэн, хасыһан, саҥа технология ньымаларын туһанан, олус интэриэһинэй, сонун дакылааттары аахпыттарын бэлиэтээтэ. Бу үлэҕэ учууталлар научнай чинчийиигэ үөрэнээччилэр бастакы хардыы оҥороллоругар көмөлөрүн, сүбэлэрин бэлиэтиэххэ наада.
Түмүккэ Кылаан чыпчаал үрдүк ааты ылла Нам 2 №-дээх орто оскуолатын 9 кылааһын үөрэнээччитэ Шадрина Эвилия. Кини төрдүн-ууһун үөрэтэн, анал программанан аймахтара туох идэлээхтэрин, дьоҕурдарын, айар талааннарын ырыппыт уонна бу үлэтэ бэйэтин инники идэтин таларыгар көмөлөөх буолуо диэн түмүккэ кэлбит.
I үрдэл тигистэ Модут орто оскуолатын 9 кылааһын үөрэнээччитигэр Осипова Самираҕа. II үрдэл – 1Хомустаах орто оскуолатын 9 кылааһын үөрэнээччитэ Соловьева Диана, III үрдэл – улуустааҕы гимназия 8 кылааһын үөрэнээччитэ Охлопкова Марина буоллулар.
Кыттааччыларга чинчийэр үлэлэрин салгыы ыыталларыгар, тиэмэлэрин дириҥэтэн үөрэтэллэригэр, архив матырыйаалларын, туһааннаах литератураны элбэхтик туһаналларыгар сүбэ-ама оҥоһулунна.
Раиса Гоголева
