Автор: Эркин курдук эрэнэр эр дьоммут,
Чөллөркөй күөмэйдэрин көҥкөтөн
Ааҕыы күрэҕэр кыттаннар
Дьиҥнээх «Дорҕоон түһүлгэтин” түстээтилэр.
Е. Лукина-Сэргээнэ
Олунньу 26 күнүгэр Н. М. Рыкунов аатынан киин библиотека ааҕар саалатыгар бэрт күргүөмнээх тэрээһин буолан ааста.
V төгүлүн улуустааҕы «Дорҕоон түһүлгэтэ» сахалыы уус-уран ааҕыы күрэҕэ эр дьон ортолоругар төрөөбүт төрүт тыл, сурук-бичик күнүгэр, Улуу Кыайыы 80 сылыгар уонна Аҕа дойду көмүскээччилэр күннэригэр ананан ыытылынна. Бу күн ааҕар саалаҕа эркин курдук эрэнэр эр дьоммут уонна кинилэри арыаллаан, арчылаан олоҥхону толорооччу, фольклору тарҕатааччы Вера Цыпандина-Харыстаана ылбаҕай сахалыы ырыатынан сүргэни көтөхтө.
Күрэхпитигэр улууспут нэһилиэктэриттэн 9 толуу эр дьон — Көбөкөнтөн Илларион Пестерев, Бөтүҥтэн Владимир Павлов, Модуттан Владимир Куличкин, Үөдэйтэн Николай Обутов, I Хомустаахтан Урсун Винокуров, Салбантан Иван Данилов, Дмитрий Местников, Хамаҕаттаттан Игнатий Брызгалов, Намтан Владимир Осипов дьоһуннаахтык кытыннылар.
Ааҕыы дьүүллүүр сүбэтэ:
- Новиков Иван Степанович – А.Ф. Шестаков аатынан норуот айымньытын дьиэтин режиссера, СӨ культуратын туйгуна;
- Лоҥхо Тэтим Буурҕат Уус – алгысчыт, тимир ууһа;
- Мохначевская Марта Мария – үлэ бэтэрээнэ, СӨ суруйааччыларын союһун чилиэнэ, Нам ууһун “Отуу уота” литературнай түмсүү чилиэнэ, 28 кинигэ автора, хоһоон айааччы.
Күрэх туһунан кыратык сырдатан ылар буоллахха, бу нууччалыыта “Открой рот” диэн сүрдээх интэриэһинэй, дорҕоонноохтук ааҕыы чемпионата Бүтүн Россия үрдүнэн ааһар. Бу чемпионат барылынан оҥоһуллубут күрэххэ бэһис төгүлүн үгэс быһыытынан эр дьон кытынна. Онон ааҕыылара да атыннык көстөр. Күрэхпит 3 түһүмэҕинэн ааста:
- Проза (кэпсээн);
- Поэзия (хоһоон);
- Аман өс (кыттааччы бэриллибит тиэмэҕэ 5 мүнүүтэ кэпсиир. Бэлэмнэнии -3 мүнүүтэ).
Кыттааччылар биирдии-биирдии тахсан талан ылбыт тиэкистэрин уустаан-ураннаан аахтылар, түмүгэр кыайыы өрөгөйүн ыллылар : III Үрдэл — Үөдэйтэн Николай Обутов, II Үрдэл — Салбантан Дмитрий Местников , I Үрдэл — Бөтүҥтэн Владимир Павлов. Муҥутуур кыайыылаҕынан таҕыста Намтан Владимир Осипов.
Бары кыттааччылар “илии тутуурдаах, өттүк харалаах”, сөҕөн-махтанан, астынан бардылар.
V yлуустааҕы «Дорҕоон түһүлгэтэ» сахалыы уус-уран ааҕыы күрэҕи сэргэхтик иилээн саҕалаан ыыттылар Мария Петрова, Людмила Григорьева.
Бары кыттааччыларга, көмөлөспүт дьоммутугар махталбытын тиэрдэбит. Инникитин да маннык үтүө тэрээһин ыытылларыгар бииргэ үлэлэһиэхпит диэн эрэнэбит.
