Автор: 
Тохсунньу — Таҥха ыйа. Таҥха — сахаларга дьылҕаны билгэлиир, инникини өтө көрөр кистэлэҥнээх кэм. Таҥха – бу саха астрологията, киһи оҥоһуутун билгэлиир итэҕэлэ, саха төрүт үгэһэ буолар. Тохсунньу 16 күнүгэр Н.М.Рыкунов аатынан Нам киин библиотекатыгар «Таайтарыылаах Таҥха киэһэтэ» дириҥ ис хоһоонноох, интириэһинэй тэрээһин буолла. Таҥха кэмигэр сахалар ыраастаныыга уонна арчыланыыга ураты болҕомтону уураллар. Былыр-былыргаттан өбүгэбит сиэринэн ыраастаныы, арчыланыы сиэрин-туомун ыытта алгысчыт Геннадий Игнатьев – Айыы оҕото “Таайтарыылаах Таҥха киэһэбитигэр” кыттыыны ыллылар айылҕаттан айдарыылаах билгэһиттэр: • Олоххо мунаахсыйартан тобулуу булуу, ыгым суолу үтэйэн ыыры кэҥэтии, өйү-санааны торумнааһыны хаартынан тойоннооһун, дьылҕа суолун сөпкө тайанарга айылҕа сүдү күүһүнэн салайыныы — Өҥөлөөх Өлөөнө; • 2026 сыл уопсай энергиятын туһунан сэһэргиэ — таронумеролог, Игропрактик. Дьоҥҥо төрөөбүт күннэринэн олохторун суолун көннөрөллөрүгэр трансформационнай оонньуу көмөтүнэн сыал-сорук туруорунарга, олох суолтатын өйдүүргэ көмөлөлөстө — Захарова Наталья — Куйаар Куо; • Былыргы сэрэбиэйгэ киирсэр билгэлээһин тарҕаммыт көрүҥүн, хаартынан сэрэбиэйдиэ — Тордуина Надежда; • Куйаар ситимин сэгэтэн Дьылҕа бэлэх үүммүт күүһүн туһанан Харысхалы бөҕөргөтүө — Яковлева Алена; • Түҥ былыргы, өбүгэттэн кэлбит уурууну суругунан билгэлээһин — Лукавина Клавдия · МАК метафорическай картанан инникигэ көрүүнү оҥордо Аграфена Винокурова Таҥха ааспыты аттаран, былыргыны ырытан, билиҥҥи олоҕу кытта тэҥнии тутан, кэнэҕэски кэлэр кэмнэри кэскиллээн көрөр улаҕалаах өйдөөх таҥара диэн саха билиҥҥи чинчийээччилэрэ быһаараллар. Бу киэһэ кэлбит Нам олохтоохторо билгэлиир-сэрэбиэйдиир дьоҕурдаахтартан санааларын сайҕаттаран, инникигэ эрэли саҕаттаран санаалыын чэпчээн тарҕастылар.
