Автор: 
Быйыл РФ суруналыыстарын Сойууһун, Саха суруйааччыларын ассоциациятын, “Отуу уота” улуустааҕы литературнай түмсүү чилиэнэ Калистрат Еремеев төрөөбүтэ 75 сылын туолла.
Еремеев Калистрат Дмитриевич 1951 сыллаахха тохсунньу 25 күнүгэр Амма Абаҕатыгар төрөөбүтэ. Кыра сааһыттан төгүрүк тулаайах хаалан эһэтигэр Еремеев Иван Константиновичка, эбэтигэр, Семен Степанович Яковлев (Эрилик Эристиин) төрөппүт кыыһыгар Валентина Семеновнаҕа иитиллибитэ. «Эриликтэр диэн аатыран олорбут оҕо сааһым сыллара баҕар суруйар дьарыкпар суол-иис хаалларбыт буолуохтарын сөп» — диэн махтанан ахтар этэ ааптар.
Суруйааччы бастакы “Суолга” диэн хоһооно 1975 сыллаахха олохтоох «Ленин суола» хаһыакка тахсыбыта. Кэлин айымньылара республика, оройуон хаһыаттарыгар бэчээттэммиттэрэ. «Тохсунньу оһуора», оҕолорго аналлаах «Кустук өҥнөөх бөтүүкчээн» диэн кинигэлэрдээх, хас да ырыа ааптара. Бүгүн Н.М.Рыкунов аатынан киин библиотекаҕа Калистрат Дмитриевич кыыһа Еремеева Сандаара Калистратовна, иккис нүөмэрдээх Нам орто оскуолатын учуутала ыалдьыттаата. Сандаара Калистратовна быйыл аҕатын үбүлүөйдээх сылыгар айымньыларын, ырыаларын түмэн, инники бэчээккэ тахсыбатах хоһооннорун, поэмаларын киллэрэн хомуурунньук таһаарар баҕа санаатын эттэ. Онон улуустааҕы «Отуу уота» литературнай түмсүү биир бастакы кыттааччыларыттан биирдэстэрэ Калистрат Еремеев саҥа хомуурунньугун долгуйа күүтэбит.
