Автор: 
Алтынньы 16 күнүгэр Н.Рыкунов аатынан киин библиотека ааҕар саалатыгар улуустааҕы “Отуу уота” литературнай түмсүү кыттыылаахтара тоҕуоруһа муһуннулар. Бу күн үөрүүлээх быһыыга-майгыга “Отуу уота” айар түмсүү чилиэннэрин Улуу Кыайыы 80 сылыгар уонна анал байыаннай дьайыыга аналлаах саҥа айымньылара түмүллэн киирбит “Улуу Кыайыы өлбөөдүйбэт чаҕыла” диэн 200 ахсаанынан, 140 сирэйинэн Дани-Алмас кинигэ кыһатыгар бэчээттэнэн тахсыбыт хомуурунньугу сүрэхтээтибит. Кинигэҕэ түмүллүбүт ахтыыларга, айымньыларга аан дойдуну аймаабыт Аҕа дойду Улуу сэриитин ыар кэмнэрэ сырдатыллаллар, анал байыаннай дьайыыга сылдьар эдэркээн дьон дьылҕатыгар долгуйуу, эйэлээх олоххо ыҥырыы иэйиилээхтик этиллэллэр. Айар куттаах дьоммут үлэлэрин, инники тахсыбыт хомуурунньуктары билиһиннэрдэ түмсүү чилиэнэ, библиотека үлэһитэ Кристина Попова. Литературнай түмсүү салайааччыта Алексей Татаринов-Удьурҕай үөрүүлээх эҕэрдэ, махтал тылларын этэн туран кинигэни хомуйан таһаарбыт Прасковья Байанаеваҕа, Марта-Марияҕа, түмсүү ыыппыт литературнай күрэх кыайыылаахтарыгар бэлэхтэри уонна түмсүүгэ саҥа киирбит Юрчана Парниковаҕа, Анна Гоголева-Графскаяҕа удостоверениелары, значоктары туттартаата. Эҕэрдэ тыллары эттилэр«Нам улууһа» МТ баһылыгын солбуйааччыта Егор Андреевич Протопопов, улуустааҕы бэтэрээннэр сэбиэттэрин председателэ Софья Дмитриевна Кобякова, Нам улууҺун култуураҕа уонна духуобунай сайдыыга управлениетын специалиһа Сахаяна Афанасьевна Орлова. Библиотека үлэһиттэрэ кинигэҕэ киирбит хоһооннору ааҕан иһитиннэрдилэр маны тэҥэ литературнай түмсүүгэ саҥа киирбит дьоммут Юрчана Парникова, Анна Гоголева-Графская, түмсүү чилиэнэ Екатерина Быкынанова эҕэрдэ тылларын эттилэр, хоһооннорун иэйиилээхтик ааҕан көрөөччүлэри астыннардылар. Юрчана Юрьевна, Марта-Мария, Татьяна Куличкина-Дедюкина-Татыйаас, Анастасия Хабарова-Айталыына Куо буруолуу сылдьар саҥа кинигэлэрин библиотекаҕа бэлэх ууннулар. «Отуу уота» айар, «Туллук хаара» мелодистар түмсүүлэрин чилиэнэ Зинаида Нератова-Тупсууна тылыгар, СӨ ырыа айааччыларын, «Туллук хаара» мелодистар түмсүүлэрин чилиэнэ, “Нам кылыһах” төрүт дорҕоон бөлөҕүн салайааччыта Маайа Григорьева дьүрүлүгэр, Тупсууна аҕатыгар Василий Охлопковка анаабыт “Туйгун связист” диэн саҥа ырыаны сүрэхтээтилэр. Ити курдук саҥа тахсыбыт кинигэ тула кэпсэтэн, элбэх хоһоон ааҕыллан, саҥа ырыа сүрэхтэнэн тэрээһиммит олус сэргэхтик буолан ааста.
