Автор: “Кинигэ –история кэрэһитэ” диэн ааттаах суруйааччылар түһүлгэлэригэр Валерий Артемович Попов кинигэтин сүрэхтии, ыалдьыттарбытыттан саҥа суруйан эрэр дьоҥҥо, иэйии куттаах суруйуу киэҥ далайыгар, эмиэ да умсугутуулаах, эмиэ да омнуолаах, айар илбис кистэлэҥнэрин сэгэтээри муһуннубут. Тэрээһин сүрүн биричиинэтэ — Валерий Попов «Уодаһыннаах сыллар туймуулара» кинигэ сүрэхтэниитэ. Манна эҕэрдэлии кэллилэр Нам общественнаһа, Валерий Артемович үөлээннээхтэрэ, бииргэ үлэлээбит, алтыспыт доҕотторо.
Валерий Артемович Попов – Мэҥэ- Хаҥалас улууһун Баатаратыттан төруттээх, төрөөбүт дойдутун улахан патриота, Республика салайар үлэлэригэр, 2000-2003 сс. Нам улууһун баһылыга Альберт Дьяконовка бастакы солбуйааччынан, Холбос потребобщество бэрэссэдээтэлинэн, дойду тардыытыттан кынат үүннэринэн айар үлэ аартыгар үктэммит СӨ суруйааччыларын сойууһун чилиэнэ.
Саха Өрөспүүбүлүкэтин култууратын үтүөлээх үлэһитэ, СӨ Духовнаһын академиятын дьиҥнээх чилиэнэ, нууччалыы тылынан суруйар бичийэр дьону түмэр, сырдатар «Полярная звезда» сурунаал сүрүннүүр редактора, переводчик, публицист Владислав Доллонов.
Биир дойдулаахпыт, улууспут киэн туттар киһитэ «Ржев –Саха (Якутия)» коммерческайа суох тэрилтэ бэрэссэдээтэлэ, Саха Өрөспүүбүлүкэтин норуотун хаһаайыстыбатын үтүөлээх үлэһитэ, Нам улууһун, 1 Хомустаах бочуоттаах олохтооҕо Николай Христофорович Горохов.
Тыа хаһаайыстыбатын управлениетыгар бииргэ үлэлээбит дьүөгэлэрэ истиҥник эҕэрдэлээн, уруккуну-хойуккуну санаан аастылар.
Саҥа тахсыбыт, история кэрчиктэрин сэгэтэр, сурукка киллэрэн үйэтиппит «Уодаһыннаах сыллар туймуулара» кинигэ 272 страницалаах, Дьокуускай куоракка, Сайдам издательскай дьиэҕэ 500 экземплярынан таҕыста. Автор тыа сирин олоҕун, дойдутун дьонун-сэргэтин, ымыы оҥостубут кыылларын — ат туһунан элбэхтик сырдатар. Кинигэ сорох айымньылара документальнай хабааннаах чахчыларга олоҕуран суруллубут. Дьон-сэргэ сөбүлээн аахпыт “Күрүөйэхтэр”, “Ырыаһыт ындыыта” кэпсээннэрэ киирбиттэр.
