ЫЛДЬАА ТУҺУНАН ЫРЫА
Улуу Ылдьаа, өркөн уолбут
Улууспутун ааттаппыта,
Буурҕа-буулдьа сылларыгар
Буһан-хатан тахсыбыта.
Хос ырыата:
Ыллыах эрэ дуораһыта
Ылдьаабытын уруйдааммыт,
Сүдү киһи төрөөбүтэ
Сүүс уон сылын уруйдааммыт!
Кырдьык иһин кыргыһыыга
Кыһыл сэрии хамандыыра
Аттаах хорсун байыастары
Атаакаҕа ыҥыртыыр.
Хос ырыата.
Саҥа үйэ салаллыбыта
Салалтаҕа тахсыбыта,
Саха сирэ сайдар суолун
Саҕахтарын арыйбыта.
Хос ырыата.
Омуоһаптаах Ойуунускай
Олохторун салҕаабыта,
Хоргуйууттан, быстар суолтан
Хоту сири быыһаабыта.
Хос ырыата.
Үтүө киһи өйдөбүлэ
Үйэлэргэ умнуллубат,
Сулус буолан сирдээн ааспыт
Суола-ииһэ сотуллубат.
Хос ырыата.
ИЛЬЯ ВИНОКУРОВ ТУҺУНАН КАНТАТА
Сүпсүктээх, түрбүөннээх, сүллэр күүс этиҥнээх
Сүүрбэһис үйэбит бастакы сыллара.
Батараак-хамначчыт баайдардыын хапсыһар
Балысхан бааллардаах, балкыырдаах кэмнэрэ.
Куһаҕан Ыал сирин кумалаан ыалыттан
Куорсуҥун анньынан хотойдуу дайбыта,
Бултанан-астанан, дьолуотун булаары
Будуллар буурҕалаах Булуҥу булбута.
Муус муора тыыныгар мускуллан-муҥнанан
Муҥутуур муударай санаата киирбитэ,
Эргэни эһэргэ эр санаа ылынан
Эҥсиэли сиригэр эргиллэн кэлбитэ.
Батараак аймаҕы батталтан быыһаары,
Бассабыык баартыйа батаһын тупппута,
Тулагы-Киллэмҥэ, туундара сиригэр
Буулдьаттан орпута, буспута-хаппыта.
Чаҕылхай Максимныын хараҥа олоҕу
Чаҕылҕан кэриэтэ күлүмнүү сырдатан,
Саҥаны сандаардан, эргэни эсиһэн
Саргылаах олоҕу салайсан барбыта.
Көмүскэс санаалаах күн айыы киһитэ
Күлүгү түһэрэр күдэни үрэйэн,
Күөмчүлүүр күүстэри утары көрсүһэн,
Күүтүүлээх, көҥүллээх олохпут кэлбитэ.
* * *
Ырыаҕа ылланан, тойукка туойуллан
Ыллыктаах ыччаппыт, Ылдьаабыт, айхаллан!
Албаныаҥ үйэҕэ үс Саха баарына,
Аатырыаҥ аар-саарга Эн, Саха саарына!
Автор: 
