Автор: Бэс ыйын 15 күнүгэр Н.М. Рыкунов аатынан киин библиотекаҕа улуустааҕы “Отуу уота” литературнай түмсүү көхтөөх айар куттааҕа Христина Софронова-Сардаҥа “Сардаҥалаах ымыыларым” диэн бастакы хомоҕой хоһоонноро түмүллүбүт хомуурунньугун сүрэхтэниитэ бэрт сэргэхтик буолан ааста. Сардаҥа 2022 сыллаахтан улуустааҕы «Отуу уота» литературнай түмсүү чилиэнэ. 2024 сыллаахха олоҕун доҕоругар Ефрем Егорович Софроновка сүүрэн-көтөн, Ефрем доҕотторуттан, аймах билэ дьонуттан ахтыы хомуйан «Арбын уола-айылҕа оҕото» диэн олус бэрт кинигэни таһааттаран үйэтиппитэ. Кини айар үлэ умсулҕаныгар киирэн, араас күрэхтэргэ кыттар, ол курдук «Барҕарыы» Өктөмнөөҕү народнай тыйаатыр тэрийэн ыытар өрөспүүбүлүкэтээҕи хоһоон күрэҕин хас да төгүллээх дипломана. Кинигэ биһирэмин “Одуванчик” оҕо былаһааккатын иитиллээччилэрэ ааптар «Саха тыла» хоһоонун ааҕан астылар, сал. Татьяна Григорьевна Исакова. Кинигэ быйыл 2026 с. бэчээттэнэн таҕыста, киирии тылын ааптар ааҕааччыларыгар билиһиннэрэн бэйэтэ суруйбут. Хоһооннор “Ахтылҕан”, “Ытылҕан” уонна “Умсулҕан” диэн түһүмэхтэргэ наарданан киирбиттэр. Кинигэҕэ төрөөбүт дойдуга таптал, айылҕаҕа үтүө сыһыан, күн сиринээҕи олох туһунан хоһуйуулар киирдилэр. Эҕэрдэ тылларын тиэртилэр улуустааҕы «Отуу уота» литературнай түмсүү салайааччыта Алексей Татаринов-Удьурҕай, Арбын нэһилиэгин олохтоох библиотекатын сэбиэдиссэйэ Антонина Николаевна Иванова, Нам улууһун доруобуйаларынан хааччахтаах дьон обществотын салайааччыта Марина Дмитриевна Литвинова, Ленскэй нэһилиэк “Сыркы” инбэлииттэр обществоларын председателэ Матрена Семеновна Иванова, Модут нэһилиэгиттэн, “Санаа оһуора” литературнай түмсүү аатыттан Екатерина Афанасьевна Лукинова-Сэргээнэ, “Ситии ситимэ түмсүү” салайааччыта Нина Петровна Корнилова, бииргэ үөрэммит доҕотторо, дьүөгэлэрэ.о.д.а. Сардаҥа республикаҕа тахсыбыт хомуурунньуктарга киирбит хоһоонноро быыстапкаҕа турдулар. Кини суруйарын таһынан араас дьарыктаах, ол курдук илиитин сылааһынан тикпит, кылынан оҥорбут оҥоһуктарын кэлбит ыалдьыттар сөҕө-махтайа көрдүлэр. Маны таһынан араас сылларга муспут сүүтүктэрэ дьон-сэргэ болҕомтотун тартылар. Ылбаҕай ырыатынан эҕэрдэтин тиэртилэр «Отуу уота» литературнай түмсүү айар куттааҕа Байдам Дайыына – Сиинкэ кыыһа.
Үтүө илгэлээх кэрэ күммүт алгыс тылларынан түмүктэннэ. Айар куттаах сырдык киһибитигэр “Отуу уота” литературнай түмсүү кыттааччытыгар Христина Петровна-Сардаҥаҕа баҕарабыт бөрүөн сыппаабакка истиҥ, сылаас иэйиилээх хоһооннорун үксүү, элбии турдуннар. Хомуурунньуктар субуу от курдук субуллан, табыллан тахсан истиннэр.
Чэгиэн сырыт, дьиэ кэргэҥҥэр дьолу-соргуну!
