19.10.2021

Үүнэр көлүөнэ аанньаллара

Тохсунньу ый 22 күнүгэр  Хатырык нэһилиэгин «Кэскил» оҕо сайдар киинигэр улууспут уһуйааннарын иитээччилэригэр  «Болҕомтолоох буолуоҥ-олоххун быыһыаҥ» диэн темаҕа семинар буолан ааста.

Бу  семинарга «Кэскил» уһуйаан үрдүк категориялаах иитээччитэ Иванова Лена Алексеевна сыралаах үлэтин туоһута буолан тахсыбыт «Болҕомтолоох буолуоҥ-олоххун быыһыаҥ» диэн 5-7 саастаах оҕолору үөрэтэр пособие -кинигэ сүрэхтэниитэ интэриэһинэй тэрээһиннээх, үрдүк таһымҥа ыытылынна. Тутатына, араас быһыыга- майгыга, суолга сэрэхтээх буолууга  туһуламмыт занятиелар көрдөрүлүннүлэр:  уот хайдах гыннахха умулларыга опыт, быһар- отор, уһуктаах тэриллэри туттарга сэрэхтээх буолууга занятияҕа онордулар, быһаҕы сэрэхтээхтик  туттарга үөрэнэн фруктовай салат астаатылар, оҕо толкуйдуур, хамаанданан үлэлиир дьоҕурдарын сайыннарарга туһуламмыт занятие ток – шоу быһыытынан буолла, суол быраабылаларын оҕо өйүгэр тиийимтиэ гына, сана сүүрээни тобулан, иитээччилэр «Светофор өҥүн бул» диэн квест оонньуу ыыттылар.  Олохтоох библиотека специалистара  семинар-презентация кыттыылаахтарыгар суолга сэрэхтээх буолууга сыһыаннаах викторина ыыттылар,  кыттааччылар кроссворд таайдылар уонна «За безопасное движение» диэн кинигэ быыстапкатын сэргээн көрдүлэр.

 

М.А.Охлопкова аатынан Хатырыктааҕы

модельнай библиотека