29.11.2022

Юлия Иванова ситиһиитэ

Кулун тутар 26 күнүгэр А.Ф.Шестаков аатынан норуот айымньытын дьиэтигэр “Путь к успеху” диэн Россияҕа культура күнүн чэрчитинэн Нам улууһун культура эйгэтигэр үлэлиир эдэр специалистар бастакы профессиональнай күрэхтэрэ ыытылынна. Күрэххэ Үөдэйтэн “Сарыал” сынньалаҥ киин уус-уран салайааччыта Геннадий Игнатьев, Фрунзеттан норуот айымньытын киинин уус-уран салайааччыта Мария Григорьева, 1Хомустаахтан “Алгыс” норуот айымньытын киинин аккомпаниатора Марина Максимова уонна биһиги биир идэлээхпит, Түбэ модельнай библиотекатын сэбиэдиссэйэ Юлия Иванова кытыннылар. Дьүүллүүр сүбэ 5 түһүмэхтээх күрэҕи сыаналаата.

Юлия Иванова бу күрэххэ олус чаҕылхайдык кытынна. Киниэхэ өйөбүл буоллулар Түбэ сынньалаҥ киинин үлэһиттэрэ, олохтоох администрация коллектива. Юлия хомоҕой тылынан, ылбаҕай ырыатынан, кэрэ сэбэрэтинэн, талба талаанынан дьон-сэргэ биһирэбилин ылыан ылла. Юлия Алексеевна профессионал быһыытынан  улууска, республикаҕа ситиһиилэрдээх. Бу күрэххэ кини библиотека иһинэн тэрийэн үлэлэтэр “АйКуо” диэн эдэр ийэлэргэ аналлаах кулуубун туһунан кэпсээтэ, сырдатта.  Уопсай түмүккэ Юлия Алексеевна “За верность призванию” диэн анал аат кыайыылааҕынан буолла.

Намнааҕы кииннэммит библиотечнай ситим коллектива биир идэлээхпитин, эдэр кэскиллээх специалиһы Юлия Алексеевнаны улуустааҕы күрэххэ ситиһиилээхтик кыттыбыккынан эҕэрдэлиибит! Библиотекарь идэтин  таһымын үрдэтэргэ өссө ситиһиилээхтик, айымньылаахтык үлэлиэн диэн эрэнэбит! Баҕарабыт саҥаттан саҥа кыайыылары, чыпчааллары, дьолу-соргуну!