Автор: Нам улууһуттан Аҕа дойду сэриитигэр фроҥҥа Ийэ дойдуларын көмүскэспит, тыылга Кыайыыны уһансыбыт биир дойдулаахтарбытын үйэтитэр Мемориал кинигэ – Мэҥэ Таас 1996 сылтан бэчээттэнэн тахсар.
Улуу Кыайыы 80 сылын көрсө Мэҥэ Таас 10 тома таҕыста. Кинигэ биир дьиэ кэргэнтэн – Ийэ дойду көмүскэлигэр диэн ис хоһоонноох бииргэ төрөөбүт ини-бии буойуттарга ананар. “Биир ыалтан бииргэ төрөөбүт ини-биилэр, аймахтыылар, уоллуу аҕалыылар сэриигэ барыылара, өлүүлэрэ-сүтүүлэрэ, ыарахан эмсэҕэлээһини ылыылара төрөппүт Ийэҕэ, Аҕаҕа, бииргэ төрөөбүттэригэр, чугас аймахтарыгар, биирдиилээн ыалга, оройуон олохтоохторугар ыар охсуунан буолбута” диэн киирии тылга Нам улууһун Ытык киһитэ, краевед Николай Дмитриевич Захаров суруйбут.
Уопсайа 19 нэһилиэктэн 234 дьиэ кэргэнтэн 562 ини-биилэр ааттара үйэтитилиннилэр. Ирдиир, чуолкайдыыр үлэни Нам улууһунааҕы архыып, нэһилиэктэр түмэллэрэ, олохтоох дьаһалталар специалистара, библиотекардар, кыраайы үөрэтээччилэр ыыттылар.
Кинигэ 300 ахсаанынан “Көмүөл” кинигэ кыһатыгар тахсыбыт. Бырайыак ааптара-улуус ветераннарын Сэбиэтин председателэ Кобякова Софья Дмитриевна буолар. Матырыйааллары хомуйан бэчээккэ бэлэмнээтилэр П.И.Сивцев аатынан Намнааҕы история уонна этнография музейын специалистара Попова Вера Дмитриевна, Николаева Анна Семеновна, Копырин Александр Иванович.
Эйэлээх олох иһин олохторун толук уурбут, Ийэ дойдуларын чиэстээхтик көмүскээбит аҕаларбыт, эһэлэрбит, хос эһэлэрбит билигин биһиги ортобутугар суохтар, ол эрэн кинилэр сырдык ааттара үйэттэн үйэҕэ кэриэстэнэ, ахтылла турдун!
