Автор: Н. М. Рыкунов аатынан киин библиотека сырдык саалатыгар сэтинньи 12 күнүгэр дьон доруобуйата тупсарын туһугар олоҕун анаабыт быраас идэлээх, СӨ доруобуйатын харыстабылын бочуоттаах бэтэрээнигэр, СӨ доруобуйатын харыстабылын туйгунугар, “Үлэ кыһыл знамя орденын кавалерыгар”, Нам улууһун бочуоттаах олохтооҕор, Далбар Хотунугар Альбина Георгиевна Алексеева сырдык кэриэһигэр аналлаах олоҕун, үлэтин кэпсиир «Сырдыгынан сыдьаайан» диэн саҥа тахсыбыт кинигэ сүрэхтэниитэ олус истиҥник буолан ааста. Кинигэ сүрэхтэниитигэр Альбина Георгиевнаны кытта бииргэ алтыспыт аймах-билэ дьоно, доҕотторо, үөлээннээхтэрэ, дьүөгэлэрэ уонна оҕолоро, сиэннэрэ кэлэн кыттыыны ыллылар. Сылаас куттаах кинигэни Альбина Георгиевна балта Мария Семеновна Федорова эдьиийин тылыттан суруйан уонна оҕолорун, сиэннэрин, аймах-билэ дьонун ахтыыларын түмэн 100 ахсаанынан, 300 сирэйинэн Москва куоракка “Ридеро” кинигэ кыһатыгар 2024 сылга бэчээттэтэн таһааттарбыт Уус-Алдан улууһун Дүпсүнүттэн төрүттээх Альбина Георгиевна 1962 сыллаахха үөрэҕин бүтэрэн, быраас идэтин баһылаан ананан кэлиэҕиттэн Нам сирин иккис дойду оҥостон, бочуоттаах сынньалаҥҥа тахсан да баран өр сылларга күнү, түүнү аахсыбакка доруобуйа харыстабылыгар терапевт бырааһынан кыһамньылаахтык үлэлээбитин туһунан бииргэ үлэлээбит коллегалара истиҥ сылаас тылларынан аҕыннылар. Альбина Георгиевна тапталлаах кэргэнинээн Иннокентий Захарович Кривошапкинныын удьуордарын утумнуур, ааттарын салҕааччы оҕолорун, кэлэр кэнчээри ыччаттарын бүөбэйдээн, көрөн-харайан, иитэн-такайан, тулаларыгар кэрэ эйгэни үөскэтэн, бэйэ-бэйэлэрин өйдөһөн-өйөһөн бу орто дойдуга 57 сыл бииргэ дьоллоох олоҕу олорбуттарын оҕолоро, сиэннэрэ долгуйан туран ахтыбыттарын саалаҕа олорор ыалдьыттар кэрэхсээн иһиттилэр. Сиэн кийииттэрэ Любовь Кривошапкина ылбаҕай ырыаны ыллаах көрөөччүлэр биһирэбиллэрин ылла. Ити курдук истиҥ-иһирэх, сылаас, үйэлээх «Сырдыгынан сыдьаайан» диэн Альбина Георгиевна дьоһун олоҕун, үтүмэн үлэтин кэпсиир кинигэ сүрэхтэнэр дьоро күнэ олус долгутуулаахтык, истиҥник буолан ааста.
