Автор:
Бүгүн, кулун тутар 14 күнүгэр Николай Рыкунов аатынан киин библиотекаҕа Россияҕа Аҕа Дойдуну, Саха Өрөспүүбүлүкэтигэр Ийэ Дойдуну көмүскэччиилэр, Нам улууһугар Кыайыы сылларынан уонна Улуу Кыайыы 80 сылын көрсө Нам улууһун библиотекатын ситимэ олунньу ыйтан тэрийэн ыыппыт »Улуу Кыайыы кинигэнэн айана» бырайыак түмүктүүр тэрээһинэ буолла. Ол курдук, бу бырайыак сүрүн сыала-соруга дойдуга бэриниилээх буолуу, гражданскай көҕү үрдэтии, бэйэ норуотун историятыгар ытыктабылы иҥэрии, Улуу Кыайыыны уһансыбыт биир дойдулаахтарбыт сырдык ааттарын үйэтии буолар.
Тэрээһиммит үөрүүлээх чааһын III төгүлүн ыытыллыбыт Өрөспүүбүлүкэтээҕи “Уоланнар ааҕыылара” хоһоон күрэҕэр Гран – При үрдүк аатын ылбыт М.Е. Охлопкова аатынан Түбэ орто оскуолатын 4 кылааһын үөрэнээччилэрэ Айысхан Сивцев, Ким Попов уонна Сахамин Бетюнскай, салайааччы Ольга Куприянова Тимофей Сметанин “Саллаат сүрэҕэ” хоһоонунан олус долгутуулаахтык арыйдылар. Ол кэннэ маннык тэрээһин олус суолталааҕын, дириҥин, история чахчытын кэрэһэлиирин туһунан Нам кииннэммит библиотека методиһа Наталья Васильевна Павлова санаатын үллэһиннэ.
Сонун бырайыак туһунан 1-кы Хомустаах нэһилиэгин “Эйгэ” саҥа көлүөнэ библиотекатын сүрүннүүр библиотекара Лариса Петровна Сивцева сиһилии сырдатта. Ол курдук, бырайыак чэрчитинэн нэһилиэк библиотекардара хоту, соҕуруу, илин, арҕаа хайысханан арахсан нэһилиэк ахсын чемоданнаах кинигэлэрин туппутунан айаннаан тиийэн Улуу Кыайыыны уһансыбыт буойуттарбытын, ол тыйыс кэмҥэ тыылга үлэлээбит дьоннорбутун билиһиннэрэи, сырдатыы, үйэтитии үлэтин ыыттылар. Бу библиотека сонун бырайыагар нэһилиэк кыраайы үөрэтээччилэрэ кыттыһан ураты ис хоһоонноох тыыны биэрдилэр.
Аныгы үйэ ирдэбилинэн бырайыак биир сүрүнэ кинигэлэр авторскай көҥүлү ылан оцифровкаланан электроннай библиотекаҕа киирэн аан дойду ханнык баҕарар муннугуттан ааҕыллар-көрүллэр кыахтаналларын туһунан Нам кииннэммит библиотека специалиһа Алексей Павлович Скрябин кэпсээтэ. Ол курдук сайтка киирэн картаҕа сулустары баттаатаххына ханнык нэһилиэккэ тэрээһин ыытыллыбыта тахсан кэлэр.
Бүгүҥҥү тэрээһин Иннокентий Иннокетьевич Иванов, Нам улууһун бэтэрээннэрин Сэбиэттэрин чилиэнэ уонна Сахаяна Афанасьевна Орлова, Нам улууһун культураҕа уонна духуобунай сайдыыга управлениятын специалиһа, Нам улууһун краеведтарын түмсүүтүн чилиэнэ бырайыак туһунан санааларын эттилэр, кэскиллээх үлэ буоларын бэлиэтээтилэр.
Тэрээһин чэрчитинэн ыччаттарга уонна ыалдьыттарга аналлаах «Пройдем дорогами Победы» квиз – оонньуу буолла. Уопсайа 5 олус интириэһинэй түһүмэхтээх, түһүмэх ахсын 6 боппуруостаах оонньуу буолла. 6 киһилээх икки хамаанда тургутустулар, түмүккэ “Сулустар”, “Звезда” хамаандалар очукуоларын тэбис тэҥҥэ үллэстэн доҕордоһуу кыайыытын туттулар, дипломунан, минньигэс бирииһинэн наҕараадаланнылар.
Үтүө, үйэтитии тэрээһиммитин Илья Винокуров — Чаҕылҕан тылларыгар, Андрей Костин матыыбыгар «Хайыһар» ырыатын күргүөмүнэн доргуччу ыллаан түмүктээтибит.
Улуу Кыайыыны уһансыбыт, уйгулаах олоҕу бэлэхтээбит аҕа көлүөнэ дьоммут өлбөт Мэҥэ ааттара сулус курдук сырдык буоллун диэн этэн туран дьоһун дьоммут сырдык ааттарыгар анаммыт кинигэлэри кытта билсиҥ, ааҕыҥ диэн бука барыгытын ыҥырабыт.
